NATO Ukrainaga Rossiya bilan mojaroni tinch yo‘l bilan hal etish bo‘yicha kelishuv doirasida alyansga qo‘shilishni va’da bermagan. Shu sababli bu uzoq muddatli ko‘rib chiqishni talab etadigan masala bo‘lib qolmoqda. Bu haqda NATO bosh kotibi Mark Ryutte rasmiy tashrif bilan Bryusselda bo‘lgan Germaniya kansleri Fridrix Merts bilan qo‘shma matbuot anjumanida ma’lum qildi.
“NATO Ukrainaga NATOga qaytmas yo‘lni va’da qildi, ammo biz hech qachon buning tinchlik kelishuvi natijasi bo‘lishini va’da qilmaganmiz. Biz buni uzoqroq istiqbolga mo‘ljallangan masala deb hisoblaymiz”, dedi u Merts bilan “Rossiya bilan mojaro tugaganidan so‘ng xavfsizlik kafolatlari”ning bir qismi sifatida Ukrainani alyansga taklif qilish g‘oyasini qo‘llab-quvvatlash haqidagi savolga javoban.
Uning so‘zlariga ko‘ra, Ukrainaning alyansga uzoq muddatli istiqbolda a’zo bo‘lish ehtimoli bor, biroq hozirda olib borilayotgan tinchlik muzokaralari doirasida emas.
Ryutte alyans 2024-yilgi sammit yakunlari bo‘yicha Ukraina uchun faqat a’zolikka “qaytmas yo‘l”ni belgilaganini, ammo aniq kafolatlar yoki muddatlarni taqdim etmaganini eslatdi. Bu ibora NATOda ta’kidlanganidek, Ukrainaning qo‘shilishi bo‘yicha aniq qarorlar yo‘qligi uchun o‘ziga xos kompensatsiya edi.
AQSH prezidenti Donald Tramp 25-aprel kuni Kiyevning NATOga qachondir kirishi ehtimoldan uzoqligini aytdi va Ukrainaning blokka a’zo bo‘lish da’volari Rossiya Federatsiyasi bilan mojaroga sabab bo‘lganini ta’kidladi.
Ryutte 4-aprel kuni Ukrainaga hech kim uni mojaro tugashi bilanoq NATOga qabul qilishni va’da qilmaganini aytdi. Uning ta’kidlashicha, alyans avvalroq Kiyevga tashkilotga a’zo bo‘lishning qaytmas yo‘lini va’da qilgan edi.
Rossiya prezidentining matbuot kotibi Dmitriy Peskov Ukraina NATOga a’zo bo‘lmasligi kerak, chunki bu Rossiyaning milliy manfaatlariga tahdid tug‘dirishini bildirgandi. Uning aytishicha Ukrainaning NATO ittifoqiga qo‘shilishi masalasi hozirgi mojaroning asosiy sabablaridan biri hisoblanadi.
Izoh (0)