Newsweek nashri AQSH, Xitoy va Rossiya o‘rtasida yaqin kelajakda dunyoning taxminiy bo‘lib olinishi tasvirlangan xaritani e’lon qildi.
Mualliflarning fikricha, Rossiyaning ta’sir doirasiga butun Yevropa, shu jumladan, Turkiya va Kavkazorti respublikalari kirishi mumkin. Xitoy esa Janubi-Sharqiy Osiyo, Yaponiya, Hindiston va Pokiston ustidan nazorat o‘rnatishga intiladi. AQSHning ta’sir hududiga esa Shimoliy Amerika va Grenlandiya kiritilgan.
Xaritada Markaziy Osiyo, Yaqin Sharq mamlakatlari, Afrika, Janubiy Amerika va Avstraliya hech bir davlatning ta’sir doirasiga tushmagan — bu hududlar “bo‘linmagan zonalar” sifatida ko‘rsatilgan. Maqolada Yevropa kengashining xalqaro munosabatlar bo‘yicha direktori o‘rinbosari Vesela Chernevaning fikrlari keltirilgan.
U Ukrainadagi urushni to‘xtatish jarayonini 1945-yilda bo‘lib o‘tgan Yalta konferensiyasi bilan qiyoslagan. O‘shanda Yevropa Sovuq urush arafasida hududlarga bo‘lingan edi.
Angliyaning Birmingem universiteti xalqaro xavfsizlik professori Stefan Volf esa quyidagi fikrlarni bildirmoqda.
Biz, ehtimol, Xitoy va AQSHning yer sharini qanday bo‘lishini kuzatamiz. Rossiya bilan nima bo‘lishi, mustaqil o‘yinchiga aylanishi yoki Xitoyga yanada ko‘proq bog‘liq qolishi hali noma’lum, deya ta’kidlaydi professor.
Newsweek nashriga ko‘ra, Markaziy Osiyo Rossiya va Xitoy o‘rtasidagi geosiyosiy raqobat zonasiga aylanishi ehtimoldan xoli emas. Tramp G‘arbiy yarimsharga e’tibor qaratmoqda, biroq u Xitoyning, xususan, Lotin Amerikasidagi ta’siriga duch kelishi mumkin.
Volfning fikricha, agar Moskva AQSH bilan Ukrainadagi urush yuzasidan murosaga erisha olmasa, uning Pekinga qaramligi kuchayadi. Shuningdek, Trampning Xitoy bilan savdo urushini kuchaytirishi natijasida Si Szinpin o‘z iqtisodiy manfaatlarini Yevropaga yo‘naltirishi mumkin. Bu esa Rossiyani zaiflashtirishi mumkin.
Izoh (0)