G20 sammiti arafasida muzokaralarda ishtirok etayotgan Xitoy vakillari Ukrainadagi urushga nisbatan neytral pozitsiyasini o‘zgartirdi. Bu haqda yuqori martabali fransuz rasmiysiga tayanib, Bloomberg xabar berdi.
“Xitoy ilgari amal qilgan neytral pozitsiya Moskva uchun foydali edi. Biroq o‘tgan yilga nisbatan Pekin Ukrainaga nisbatan moslashuvchanroq pozitsiyani egalladi”, — dedi anonim amaldor.
Ta’kidlanishicha, bu G‘arb davlatlari tanlagan pozitsiyani hisobga olgan holda muhim nuqta bo‘lib, Xitoyni urushni to‘xtatish uchun Rossiyaga bosim o‘tkazishga chaqiradi.
Fransiya rasmiysiga ko‘ra, G20 a’zoligiga kiruvchi barcha davlatlar Ukrainadagi urush bo‘yicha umumiy tilga kelishib olgan. Shunga qaramay, sammitga mezbonlik qilayotgan Hindiston hamon Rossiyaning Ukrainaga hujumini “qoralashdan bosh tortmoqda”.
Putin va Si Szinpin sammitda qatnashmaydi
G20 sammiti 9—10-sentabr kunlari Nyu-Dehlida bo‘lib o‘tadi. Rossiya prezidenti Vladimir Putin sammitda qatnashmaydi. Rossiya tomonidan tashqi ishlar vaziri Sergey Lavrov ishtirok etadi. Xitoy yetakchisi Si Szinpin ham tadbirda qatnashmaydi. Uning o‘rniga sammitda Xitoy xalq respublikasi davlat kengashi bosh vaziri Li Tsyan ishtirok etadi.
Izoh (0)