Litvada NATOning sharqiy qanotini mustahkamlash uchun Germaniya qurolli kuchlari brigadasi rasman doimiy asosda joylashtirildi. Bu haqda Politico xabar berdi.

Besh ming harbiydan iborat tuzilma 2027-yil oxirigacha to‘liq jangovar tayyorgarlikka ega bo‘lishi rejalashtirilgan. Bu Ikkinchi jahon urushidan beri ilk bor nemis harbiylarining xorijda doimiy joylashuvi sanaladi.
Bizda aniq vazifa bor. NATOning sharqiy qanotida Litva ittifoqchilarining himoyasi, erkinligi va xavfsizligini ta’minlashimiz kerak, dedi Bundesverning Litvadagi 45-tank brigadasi qo‘mondoni general Kristof Xuber.
U brigadaning Litvada joylashtirilishi NATO hududini va Germaniyaning o‘zini himoya qilishni ta’minlashini ta'kidladi.
Litva tarixidagi eng yirik harbiy infratuzilma
Brigadaning asosiy joylashuv punkti Vilnyusdan 30 kilometr janubda joylashgan, hali qurilmagan Rudninkaydagi harbiy majmua bo‘ladi. O‘sha paytgacha harbiylar vaqtinchalik bazalarda joylashadi. Hozirda Litvada Germaniyaning atigi 150 nafar harbiy xizmatchisi bor.
2024-yil avgust oyida Litva Mudofaa vazirligi Rudnikayda “Litva tarixidagi eng yirik harbiy infratuzilma” qurilishi boshlanayotganini e’lon qilgan. Harbiy shaharcha maydoni 170 gektarni tashkil etadi.
Rossiya va Belarus bilan chegaradosh bo‘lgan Litva Germaniyaning harbiy ishtirokini o‘z milliy xavfsizligi uchun muhim deb baholaydi.
Germaniya mudofaa vaziri Boris Pistorius 2024-yil oktyabr oyida Litva parlamentida so‘zlagan nutqida Germaniya qurolli kuchlari Rossiyaning Yevropadagi tajovuzini to‘xtatib turishda asosiy tayanch bo‘lishga tayyorligini aytgandi. U Ukrainadagi urush Rossiya uchun faqat boshlanishi ekanini ta’kidlagan.
Rossiya gibrid usullar bilan bizning birdamligimizni, Yevropa Ittifoqi va NATOni zaiflashtirishga urinmoqda. Putinning haqiqiy dushmani — bizning erkin va mustaqil, demokratik turmush tarzimizdir, deya alohida ta’kidlagan u.
Izoh (0)