Rossiya prezidenti Vladimir Putinning Xitoyga tashrifi har ikki davlat tomonidan tinchlik sa’y-harakatlarini muvofiqlashtirish sifatida taqdim etilmoqda, ammo aslida Pekin va Moskva G‘arbga qarshi turishga tayyorlanmoqda. Bu haqda ikki davlat yetakchilarining bayonotlarini tahlil qilib, The Telegraph xabar berdi.
Yopiq eshiklar ortidagi muzokaralar oldidan kameraga bergan izohlarida ikki yetakchi global barqarorlik va Ukrainadagi urush kabi konfliktlarni hal qilish borasida gapirdi. Ammo ular 16-may kuni ertalab muzokaralar olib borish uchun stolga o‘tirganlarida, gap faqat tinchlik haqida ketmadi, — deyiladi xabarda.
Putinga Xitoyda yangi mudofaa vaziri Andrey Belousov, Rossiya Xavfsizlik kengashiga kotibi etib tayinlangan Sergey Shoygu, “Rosatom” va “Roskomos” rahbarlari hamrohlik qilmoqda. Tahlilchilar fikricha, bu davlatlar o‘rtasidagi harbiy hamkorlik kuchayganidan dalolat beradi.
AQSH boshchiligidagi dunyo tartibini o‘zgartirish uchun Putin va janob Si “chegarasiz” birgalikda hamkorlik qilishga tayyor ekanliklarini yashirishmadi, — deb yozmoqda The Telegraph.
Shuningdek, nashr Xitoy Rossiyaning Ukrainaga qarshi hujumini qoralashdan bosh tortgani va Rossiya harbiy-sanoat kompleksini ikki tomonlama texnologiyalar bilan ta’minlayotganini ta’kidlamoqda.
Putin Xitoyga tashrifi arafasida bu uchrashuv “strategik sheriklik” doirasida “mamlakatlarimizning hududiy yaxlitligi va xavfsizligini” mustahkamlash bo‘yicha birgalikdagi saʼy-harakatlarga yordam beradi, degandi.
Bu harbiy va geosiyosiy hamkorlik uchun nimani anglatishiga kelsak, ikki rahbar, ehtimol, G‘arbni o‘ylantirishda davom etadi, — deya xulosa qiladi the Telegraph.
Eslatib o‘tamiz:
- Rossiya prezidenti 16-may kuni rasmiy tashrif bilan Pekinga tashrif buyurib, Xitoy raisi bilan uchrashdi.
- Ikki tomonlama muzokaralar chog‘ida savdo-iqtisodiy hamkorlikni rivojlantirish va kengaytirish masalalariga eʼtibor qaratish rejalashtirilgandi.
- Uchrashuvda Putin va Si Szinpin eng dolzarb siyosiy hamda mintaqaviy masalalarga ham to‘xtalib o‘tgan.
Xitoyga davlat tashrifining ikkinchi bosqichi 17-may kuni Xarbinda bo‘lib o‘tadi. U yerda Putin VIII Rossiya—Xitoy ko‘rgazmasi va Mintaqalararo hamkorlik bo‘yicha IV Rossiya—Xitoy forumining ochilish marosimida ishtirok etadi, Xarbin politexnika universiteti talabalari va o‘qituvchilari bilan uchrashadi.
Izoh (0)