Fransiya prezidenti Emmanuel Makron yadro qurolidan foydalanish bo‘yicha muzokaralar boshlanishini, Rossiya agressiyasi “chegara bilmasligini” aytgan edi. Rosiya tashqi ishlar vaziri Sergey Lavrov buni o‘z mamlakatiga nisbatan tahdid deb baholadi. Bu haqda “RIA Novosti” xabar berdi.
Makron 6-martdagi nutqida harbiy byudjetni oshirishni davom ettirishga va’da berdi. Shuningdek, u butun Yevropa ittifoqini himoya qilish uchun fransuz yadro qurolidan foydalanish bo‘yicha munozara boshlashni taklif qildi.
Albatta, bu Rossiyaga qarshi tahdiddir. U bizni tahdid deb hisoblab, Yevropa mamlakatlari va Britaniya bosh shtablari rahbarlarini yig‘sa, yadro qurolidan foydalanish kerakligini aytsa, Rossiyaga qarshi yadro qurolini ishlatishga tayyorgarlik ko‘rayotgan bo‘lsa, shubhasiz, bu tahdid hisoblanadi, dedi Lavrov.
Shuningdek, u Makronning Ukraina taslim bo‘lishiga yo‘l qo‘yib bo‘lmasligi haqidagi bayonotini “bema’nilik” deb atadi. Lavrov Fransiya prezidenti o‘z xavotirlarini rossiyalik hamkasbi Vladimir Putin bilan muhokama qilish imkoniyatiga ega ekani, biroq bunday qilmayotganini ta’kidladi.
Makron vaqti-vaqti bilan mag‘rurlanib, Putinga, albatta, qo‘ng‘iroq qilishi va u bilan gaplashishini aytadi. Uning bunday imkoniyatlari bor. Hech kim bunga to‘sqinlik qilmaydi. Aksincha, prezident barcha hamkasblari bilan muloqotga doim ochiqligini ta’kidlab kelmoqda.
Rossiyaning Yevropa va Fransiyaga qarshi urush tayyorlayotgani haqidagi bu aqlga sig‘maydigan ayblovlarga kelsak, Putin bunday fikrlarni alahsirash, safsata deb atab, bir necha bor o‘z fikrini bildirgan, dedi vazir.
Shu bilan birga, u har qanday “aqli raso odam” Moskvaga Yevropa bilan qurolli mojaro kerak emasligini tushunishi kerakligini ta’kidladi. U Yevropa tinchlikparvar kuchlarini Ukrainada joylashtirish fikriga to‘xtalib o‘tdi.
Biz ushbu (Yevropa) qo‘shinlarining Ukraina hududidagi mavjudligini xuddi NATOning Ukrainadagi potensial mavjudligini ko‘rib chiqqanimizdek ko‘rib chiqamiz, dedi u.
Makron yadroviy qurol bo‘yicha qanday bayonot bergandi?
Fransiya prezidenti mamlakat ixtiyorida mavjud “tiyib turish” qurollaridan Yevropa xavfsizligini ta’minlashda foydalanishga tayyorligini aytdi. U, shuningdek, mudofaa xarajatlari oshirilishini ta’kidlab, buni zarurat deb atadi.
Makronning ta’kidlashicha, “nima bo‘lishidan qat’i nazar, yadro qurolidan foydalanish to‘g‘risidagi qaror har doim Fransiya prezidenti qo‘lida bo‘lgan va bo‘ladi”.
Buyuk Britaniya Yevropa ittifoqidan chiqqandan so‘ng, Fransiya yadro quroliga ega bo‘lgan yagona ittifoq mamlakati bo‘lib qoldi. Yevropa hududida Amerikaning yadroviy kallaklari joylashtirilgan, biroq Donald Tramp hokimiyatga kelganidan keyin Amerika kuchlarini Yevropadan olib chiqib ketish mumkinligi haqidagi munozaralar faollashdi.
2017-yilda Parij “Mudofaa va milliy xavfsizlik bo‘yicha strategik sharh”ni e’lon qildi. Unda o‘zining yadro siyosatining asosiy mohiyati belgilab berdi:
- Fransiyaning yadroviy tiyib turish siyosati faqat mudofaa xarakteriga ega;
- yadro qurolidan foydalanish “faqat qonuniy o‘zini himoya qilishning favqulodda sharoitlarida mumkin bo‘ladi”, shu sababli bu qurollar “millat xavfsizligi, himoyasi va mustaqilligining kafolati” hisoblanadi.
Izoh (0)