“Daryo” nashri 13-martda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Nega Baxmutdagi urushda Rossiya armiyasi o‘rniga Vagner hujumchilari jang qilmoqda ?
Baxmutdagi urush davom etmoqda. Ayni paytda Rossiya tomonida jang qilayotgan Vagner hujum otryadlari Ukraina qo‘shinlari mudofaasini yorib o’tib shahar markaziga kirishga urinyapti.
Ukrainaning quruqlik qo‘shinlari qo‘mondoni aytishicha, hozirda
artilleriya, tank va boshqa qurollar yordamida shahar egallanishiga to‘sqinlik qilinmoqda.
Baxmut janglari yoritilayotgan xabarlarda, so‘nggi paytlar Vagner tarkibidagi yo‘qotishlarga e’tibor qaratildi. Prigojin bu yo‘qotishlarga qanday maqsadni ko’zlab rozi bo‘lgandi?
Urushni tadqiq qilish instituti tahlillariga ko‘ra, Putin o‘z rejimini himoya qilish uchun “Vagner”dan foydalandi. Prigojin esa Baxmutni o‘z maqsadlariga erishishda Kreml ustidan ta’sir o‘tkazish imkoniyati sifatida ko‘rgan.
Urush qanday yakunlanishi kerak? Ukraina va AQSH munosabatlari keskinlashyapti
Politico xabariga ko‘ra, hozirga kelib Ukraina va AQSH o‘rtasida parda ortidagi kelishmovchiliklar kuchaygan. Bu ikki mamlakat munosabatlaridagi asosiy "inqiroz nuqtasi" urush qanday yakunlanishi kerakligi haqidagi qarashlardir.
Mazkur vaziyatda Vashington Rossiya Qrimni yo‘qotish bilan kelishib olishiga shubha qilyapti. Ammo shunga qaramay AQSH urush va tinchlik bo‘yicha qarorlarni Zelenskiy ixtiyoriga qoldiradi.
Xitoy rahbari Si Szinpin Rossiya va Ukraina prezidentlari bilan uchrashadi
Xitoy yetakchisi Si Szinpin kelasi hafta Vladimir Putin bilan uchrashish uchun Rossiyaga boradi. Reuters ma’lumotlariga ko‘ra uchrashuv rejalashtirilgan vaqtdan ko’ra ertaroq amalga oshirilmoqda.
Avvalroq Rossiya OAV Putin Si Szinpinni bahorda mamlakatga kelishga taklif qilganini yozgan. G‘arb manbalari esa bu tashrif aprel-may oylarida bo‘lishini aytgan edi.
WSJ ma‘lumotlariga ko‘ra, Xitoy raisi Putin bilan uchrashuvdan keyin, Ukraina prezidenti Vladimir Zelenskiy bilan virtual uchrashuv o‘tkazadi.
“Putin va Zelenskiy bilan suhbat Xitoyning Ukrainadagi urushni tugatish vositachiligida faolroq rol o‘ynash istagini aks ettirishi mumkin”, — deya ta’kidlamoqda nashr manbalari.
Pekinda o‘tkazilgan Eron va Saudiya Arabistoni muzokaralaridan so‘ng, Xitoyning navbatdagi harakatlari global kuch markazi sifatidagi obro‘sini yanada oshiradi.
Janubiy Koreya yadro quroli ishlab chiqarishi mumkin, buning sabablari nimada?
Shimoliy Koreya bu safar suvosti kemasidan “strategik qanotli raketalar” uchirdi va keyinroq ular Yapon dengizidagi nishonga tegganini ma’lum qildi.
Shundan so‘ng Seul meri O Se Xun Janubiy Koreya o‘z yadro qurolini ishlab chiqishi kerakligi haqidagi chaqiriq bilan chiqdi. "Biz shunday nuqtaga keldikki, endi odamlarni yadro qurolini yaratishdan tiyilish va yadrosizlanish g‘oyasiga sodiq qolishimiz kerakligiga mantiqan ishontirish qiyin”.
Shu bilan birga siyosatchi "Ukrainada urush boshlanganidan keyin Koreya yarimorolining yadrosizlanishi “o‘z jozibadorligini yo‘qotgan”ini ta’kidladi.
Seul meri aslida kim va uning bunday chaqiriq bilan chiqishiga faqatgina yuqoridagi holatlar sababmi?
Seul meri — respublika prezidenti Yun Suk Yolning konservativ “Xalq hokimiyati partiyasi”ning nufuzli a’zosi hisoblanadi va u 2027-yilgi prezidentlik saylovida davlat rahbari lavozimiga da’vogarlik qilishi mumkin.
Lekin Shimoliy Koreya armiyasidagi yutuqlar fonida Janubiy Koreyaning yuqori martabali amaldorlari ham ayni paytda yadro qurolini ishlab chiqish yoki AQSHning 1990-yilda Koreyadan olib ketgan Amerika taktik yadro bombalari va raketalarini qayta joylashtirish masalasini ko‘tarmoqda.
Izoh (0)