Xitoy raisi Si Szinpin Ukraina prezidenti Vladimir Zelenskiy bilan urush boshlanganidan beri ilk virtual uchrashuvni o‘tkazishni rejalashtirmoqda. Bu haqda manbalarga tayanib, The Wall Street Journal xabar berdi.
Suhbat virtual bo‘lib o‘tishi kutilmoqda va u Si Szinpin Rossiya prezidenti bilan uchrashganidan keyin tashkillashtirilishi mumkin.
“Putin va Zelenskiy bilan suhbat Xitoyning Ukrainadagi urushni tugatishda vositachilik qilishda faolroq rol o‘ynash istagini aks ettirishi mumkin”, — deya ta’kidlaydi WSJ manbalari.
Zelenskiy bilan onlayn muzokara olib borish amalga oshsa, bu Xitoyning tinchlikparvar rolni o‘ynashga qaratilgan harakatlarida muhim qadam bo‘ladi. Sababi Yevropa bunga shubha bilan qarab kelgan.
WSJning qo‘shimcha qilishicha, bu o‘tgan hafta Pekinda Eron va Saudiya Arabistoni 7 yil o‘tib diplomatik aloqalarni tiklash bo‘yicha muzokara o‘tkazganidan so‘ng Xitoyning global kuch markazi sifatidagi obro‘sini oshiradi.
Avvalroq Zelenskiy Xitoy raisi bilan uchrashsa, bu uchrashuv ikki mamlakat va dunyodagi xavfsizlikka foyda keltirishini aytgandi. Xitoy rahbari Si Szinpin esa kelasi haftada hamkasbi Vladimir Putin bilan uchrashish uchun Rossiyaga borishni rejalashtirayotgani ma’lum qilingan.
Izoh (0)