Rossiya Ukrainadagi urushni 2026-yilgacha yakunlashni rejalashtirmoqda, aks holda hech qachon AQSH va Xitoy darajasiga yeta olmaydi. Bu haqda Ukraina Bosh razvedka boshqarmasi boshlig‘i o‘rinbosari Vadim Skibitskiy ma’lum qildi.
Skibitskiyning so‘zlariga ko‘ra, Rossiya 2045-yilgacha ehtimoliy harbiy mojarolarning 15 ta ssenariysini prognoz qilgan. Ulardan oltitasi shimoliy Yevropa bilan bog‘liq.
Shimoliy Yevropa va Boltiqbo‘yi davlatlari vaziyatni tushunmoqda. Polsha ham tushunmoqda. Polsha uchun ehtimoliy harbiy to‘qnashuvning to‘rtta ssenariysi mavjud. Polsha hozir buning bevosita tahdid ekanini anglab yetmoqda, dedi Ukraina razvedkasi vakili.
U Moskvada 2026–2035-yillarga mo‘ljallangan geosiyosiy prognoz ishlab chiqilib, uning 2045-yilgacha bo‘lgan oqibatlari baholanganini aytdi. Hujjatlarda “Ukraina masalasi” 2026-yilgacha hal etilishi lozimligi ko‘rsatilgani aytilmoqda.
Chunki agar urush yana 5-10 yil davom etadigan bo‘lsa, Rossiya hech qachon AQSH va Xitoy darajasiga yetib ololmaydi va ular bilan tenglasha olmaydi, deya qo‘shimcha qildi Skibitskiy.
U Yevropa xavfsizlik tizimini tashkil etishning yangi yondashuvlarida Ukrainaning roli muhim ekanini qo‘shimcha qildi.
Rossiyaning boshqa davlatlarga ehtimoliy hujumi: mavzuga oid yangiliklar
NATO doiralaridagi manbalarga ko‘ra, Rossiya Finlyandiya va NATOning sharqiy qanotidagi boshqa davlatlarga hujum qilish rejasini ishlab chiqqan. Gap Rossiya armiyasining bir nechta bo‘linmalarining bir vaqtning o‘zida hujumi haqida ketmoqda. Unga o‘n minglab askar jalb qilinishi ehtimoli borligi aytilgan.
Financial Times nashriga ko‘ra, Rossiya Yaponiya va Janubiy Koreya bilan ehtimoliy urush uchun nishonlarning batafsil ro‘yxatini tuzgan. Ro‘yxatga 160 ta harbiy va fuqarolik infratuzilmasi obyektlari — atom elektr stansiyalari, ko‘priklar, zavodlar va qo‘mondonlik punktlari kiritilgan. 2008–2014-yillardagi maxfiy hujjatlar X-101 raketalari bilan zarbalar berishni va Yaponiya hamda Janubiy Koreyaning havo mudofaasini tekshirishni tasvirlaydi.
Yevropa diplomatiyasi rahbari Kaya Kallas Rossiya 2028-yildayoq Yevropa ittifoqiga hujum qilishi mumkinligini aytib, Yevropani mudofaa xarajatlarini oshirishga chaqirgan. NATO bilan urush 4-6 yildan keyin bo‘lishi mumkinligi ta’kidlangan.
Izoh (0)