Rossiya armiyasi 4-aprel kuni Ukrainaning Krivoy Rog shahridagi turar joy kvartaliga raketa hujumi uyushtirdi. Hujum oqibatida halok bo‘lganlar soni 20 kishiga yetdi. Ularning to‘qqiz nafari bolalardir. Bu haqda Deutsche Welle xabar berdi.
Ma’lumotlarga ko‘ra, bu Ukrainadagi keng ko‘lamli urush davridagi eng yirik bolalar o‘limi hisoblanadi. BMTning inson huquqlari bo‘yicha oliy komissari Folker Tyurk hujumga shunday munosabat bildirdi. U 5-aprel kuni Inson huquqlari bo‘yicha komissiya zarba joyiga borib, yetkazilgan zararni hujjatlashtirgani va o‘ldirilgan 9 nafar bolaning ismini aniqlaganini aytdi. Hozirda tashkilot mutaxassislari ma’lumot yig‘ishda davom etmoqda.
Bu 2022-yil fevralida boshlangan keng ko‘lamli bosqin davridan beri bolalarga qarshi amalga oshirilgan eng halokatli hujum hisoblanadi. Bu aql bovar qilmaydigan dahshat — to‘qqiz bola halok bo‘ldi, ularning aksariyati bog‘da o‘ynayotganda ularning tepasida harbiy qurol parchalari portladi. Krivoy Rogda oilalar bolalar maydonchasi, restoran va turar joy binolari oldida to‘planganida portlash 18 kishining hayotiga zomin bo‘ldi, deyiladi tashkilot bayonotida.
BMT oliy komissari ta’kidlashicha, Rossiya tomonidan aholi zich joylashgan hududda portlovchi qurollarning qo‘llanishi tinch aholi hayotiga beparvolik bilan munosabatda bo‘lishni ko‘rsatadi.
Rossiya rasmiylari hujum nishoni ukrainalik harbiylar guruhi bo‘lganini da’vo qilmoqda. Biroq voqea joyidagi mahalliy aholining BMT komissiyasiga aytishicha, hujumdan biroz oldin restoranda kosmetologlar forumi bo‘lib o‘tgan — bu haqda internetda ham xabarlar bo‘lgan va u yerda hech qanday harbiylar bo‘lmagan.
Hatto Rossiya rasmiylari harbiylar bo‘lishi mumkinligi haqida ma’lumotga ega bo‘lgan taqdirda ham, hujumning usuli va sharoiti uni nishonni tanlamasdan amalga oshirilgan hujum sifatida baholashga asos bo‘ladi, deyiladi BMTning Inson huquqlari bo‘yicha oliy komissari boshqarmasi bayonotida.
Bayonotda, shuningdek, bunday hujumlar xalqaro gumanitar huquq bilan taqiqlangani va harbiy jinoyat hisoblanishi eslatib o‘tilgan.
Izoh (0)