Xitoy hukumati Ukrainadagi ehtimoliy tinchlikparvar missiyada ishtirok etish imkoniyatini ko‘rib chiqmoqda. Bu haqda Yevropa ittifoqining diplomatik doiralaridagi ishonchli manbalarga tayanib, Weltam Sonntag gazetasi xabar berdi.
Nashr manbalariga ko‘ra, xitoylik diplomatlar Bryusselda yevropalik hamkasblari bilan maslahatlashib, Xitoyning Fransiya tashabbusi bilan tuzilgan “ishtiyoqmandlar koalitsiyasi”dagi ishtiroki masalasini sinchiklab o‘rgangan. Ularni Yevropa davlatlari bunday qadamga ijozat berishi yoki yo‘qligi qiziqtirgan.
Xitoyning “ishtiyoqmandlar koalitsiyasi”ga qo‘shilishi Rossiyaning Ukrainada tinchlikparvar kuchlar bo‘lishiga rozilik berish ehtimolini oshirishi mumkin, deya ta’kidladi Bryusseldagi manbalar.
Ular har qanday holatda ham bu “nozik” masala ekanini qayd etdi. Bundan oldin Fransiya prezidenti Emmanuel Makron 27-mart kuni Ukraina tarafdorlarining navbatdagi sammiti o‘tkazilishini e’lon qilgan edi.
Kelasi payshanba kuni biz “Ishtiyoqmandlar koalitsiyasi” (Ukrainaga tinchlikparvar kuchlar yubormoqchi bo‘lganlar) sammitini o‘tkazamiz. Mening asosiy maqsadim Ukrainani qisqa muddatda qo‘llab-quvvatlash bo‘yicha takroriy, aniq va, ehtimol, biroz batafsil majburiyatni olishdan iborat bo‘ladi, dedi u 20-mart kuni Bryusselda bo‘lib o‘tgan YI sammitidan so‘ng.
Ukrainaga xorijiy kontingentni yuborish masalasi
Rossiya bilan urush tugaganidan keyin Ukrainaga tinchlikparvar kuchlarni yuborish missiyasiga Buyuk Britaniya va Fransiya boshchilik qilmoqda. Turkiya, Kanada va Avstraliya ushbu maqsadlar uchun o‘z qo‘shinlarini ajratishga allaqachon rozi bo‘lgani aytilmoqda. Yana 30 dan ortiq davlat missiyani, jumladan, qurol-yarog‘ va moddiy-texnik jihatdan qo‘llab-quvvatlashga tayyor.
Ukrainaga 30 minggacha tinchlikparvar kuchlarni yuborish masalasi muhokama qilinmoqda. Britaniya o‘z harbiylarini muddatsiz joylashtirishni rejalashtirmoqda, ya’ni “tinchlik bitimini saqlab qolish va Rossiyani ushlab turish uchun qancha kerak bo‘lsa, shuncha”. 27-mart kuni koalitsiya mamlakatlari majburiyatlarning tafsilotlarini muhokama qilish uchun yana yig‘iladi.
Bu orada Xitoy tashabbusga e’tibor qarata boshladi. Yevropa ittifoqi diplomatik doiralaridagi manbalarga ko‘ra, Pekin o‘z diplomatlari orqali missiyada ishtirok etish masalasini ko‘targan. Manbalar mazkur qadam Ukrainaga tinchlikparvar kuchlarni yuborish ehtimolini oshirishini aytmoqda.
Rossiya qanday munosabatda?
Bloomberg agentligining Kremldagi manbalari Rossiya prezidenti Vladimir Putin tinchlikparvar kuchlar sifatida aynan Xitoy yoki boshqa “neytral” davlatlar qo‘shinlarini ko‘rishni istayotgani, Yevropa kontingenti ishtirokiga qarshi chiqayotganini ma’lum qilgan. Tashqi ishlar vaziri Sergey Lavrovning tushuntirishicha, Ukrainada NATO kuchlarining har qanday bayroq ostida paydo bo‘lishi urushning “asosiy sabablari” yo‘qolmaganini anglatadi.
Izoh (0)