Ford, General Motors va Stellantis (Chrysler sho‘ba korxonasi) kabi Amerikaning yirik avtomobil ishlab chiqaruvchilari AQSH hukumatini Oq uy rahbari Donald Trampning keskin savdo-iqtisodiy siyosatini yumshatishga ishontirishga urinmoqda. Bu haqda Bloomberg xabar bermoqda.
Amerikalik avtogigantlar import mahsulotlariga qo‘yilgan 25 foizlik bojlar sohaga jiddiy zarar yetkazishidan xavotirda. Bojxona stavkalarining oshishi chet elda ishlab chiqarilgan ehtiyot qismlar narxining keskin ko‘tarilishiga olib kelishi mumkin. Bu esa, o‘z navbatida, AQSHda mashina ishlab chiqarish tannarxini oshiradi, chunki mahalliy konsernlar bunday sharoitda o‘z avtomobillari narxini ko‘tarish yoki ishlab chiqarishni qisqartirishdan boshqa ilojsiz qoladi.
Bunday salbiy oqibatlarning oldini olish uchun Amerikaning yirik kompaniyalari vakillari hozirda bojlarni yumshatish uchun faol lobbichilik qilmoqda. Ular, xususan, AQSHda mashinalarni yig‘ish uchun zarur bo‘lgan ayrim ehtiyot qismlarga qo‘yilgan yuqori bojxona stavkalarini bekor qilishni talab qilmoqda.
Bu, asosan, Meksikada ishlab chiqarilayotgan video ekranlar va elektr simlari uchun qobiqlarni o‘z ichiga oladi. Ma’lum qilinishicha, yetakchi konsernlar rahbarlari allaqachon Oq uy va Savdo vazirligi vakillari bilan muzokaralar o‘tkazgan.
Mart oyi boshida Tramp Meksika va Kanadaning barcha tovarlariga 25 foizlik boj joriy etdi. Faqat Kanada energiya resurslari bundan mustasno bo‘lib, ularga 10 foizlik import stavkasi belgilandi.
Xitoylik eksportchilar esa 20 foizlik yig‘im to‘lashlari kerak bo‘ladi. XXR tovarlariga boj ikki baravarga oshirildi. Xorijda ishlab chiqarilgan avtomobillar va ehtiyot qismlarni AQSHga import qilish stavkalari 25 foizni tashkil etadi. Bu chora hech bir istisnosiz barcha mamlakatlarga tatbiq etiladi.
Izoh (0)