28 yoshida fan doktori, 30 yoshida professor ilmiy unvoniga sazovor bo‘lgan Elyorjon Jumayevning nomi AQSH, Janubiy Koreya va Yevropa mamlakatlari ilmiy doiralarida yaxshi tanish. U 350 dan ortiq yangi turdagi materiallarni kashf etgan, 10 ga yaqin xalqaro patentlarga ega.
Qashqadaryoning Nishon tumanida ziyoli oilasida tug‘ilgan Elyorjonning ilmiy ishlanmalari Hyundai Motors, Samsung, NASA va Oak Ridge kabi kompaniya va tashkilotlarning ishlab chiqarish jarayonlariga tatbiq etilgan. Joriy yilning mart oyida AQSHning Las-Vegas shahrida bo‘lib o‘tgan TMS Annual Meeting – 2025 Butunjahon konferensiyasida Elyorjon Jumayev rahbarligidagi o‘zbek olimlarining ilmiy ishi 1-o‘ringa sazovor bo‘ldi.
— Mazkur anjuman AQSHning Metall, minerallar va materiallar tashkiloti tomonidan har yili an’anaviy tarzda o‘tkazib kelinadi va shu sohalarda ishlayotgan yetakchi olimlar va ilmiy tashkilotlarni jalb etadi. Bu yil konferensiyada 4 ming nafardan ortiq olim qatnashdi. O‘zbekiston jamoasi “Yuqori entropiyali qotishmalarning mikrostrukturasi va mexanik xossalariga turli issiqlikdagi toblash (annealing) davomiyliklarining ta’siri chuqur tahlili” mavzusidagi ilmiy ish bilan ishtirok etdi.
Kashfiyotimizda yangi turdagi zamonaviy materiallarning yuqori haroratga chidamliligini ta’minlash yo‘llari yoritib berilgan. Ularning mexanik xususiyatlarini saqlagan holda, nano o‘lchamda strukturaviy o‘zgarishlari bayon etilgan. Tadqiqotimiz materialshunoslik yo‘nalishidagi dolzarb muammolarga yechim taklif qilgani uchun xalqaro hakamlar hay’ati tomonidan birinchi o‘ringa loyiq ko‘rildi, deydi Elyorjon Jumayev.
Bu yutuq avtomobilsozlik, metallurgiya, kemasozlik sanoatlarida, umuman yuqori haroratga chidamli materiallar ishlatiladigan tarmoqlarda keng qo‘llanilishi mumkin. Yangi materiallar korroziya va eroziyaga bardoshli bo‘lib, uzoq vaqt xizmat qilishi bilan ahamiyatli.
— AQSHda o‘tkaziladigan ushbu anjumanning nufuzini sohada faoliyat olib borayotgan olimlar yaxshi biladi. Unda birinchi o‘rinni olish men uchun katta sharaf. Bu O‘zbekistonlik yoshlar nafaqat sport yoki san’at, balki ilm-fan yo‘nalishida ham olamshumul g‘alabalarni qo‘lga kiritishga qodir ekanidan dalolat. Biz taqdim etgan kashfiyotga hozirdanoq dunyoning yirik ishlab chiqarish kompaniyalaridan qiziqish bildirilmoqda. Ilmiy ishlanmalarimiz O‘zbekiston sanoatida ham keng qo‘llanilishini xohlaymiz, deydi u.
O‘zbek olimlarining yutug‘iga bag‘ishlangan videolavhani YouTube’dagi sahifamizda tomosha qilishingiz mumkin.
Izoh (0)