G‘azo sektoridagi falastinliklar Ramazon hayitini oziq-ovqat ta’minoti kamayayotgani va Isroil hujumlari fonida qarshi oldi. Bu haqda Al Jazeera xabar berdi.
Isroilning 30-mart kuni uyushtirgan aviahujumlarida kamida 20 nafar falastinlik halok bo‘ldi, ularning aksariyati ayollar va bolalardir. Falastinliklar Ramazon hayitini vayronaga aylangan masjidlar oldida kutib oldi.
Bu qayg‘u bayrami. Yaqinlarimizdan, farzandlarimizdan, hayotimizdan, kelajagimizdan ayrildik. Biz o‘quvchilarimizni, maktablarimizni, muassasalarimizni yo‘qotdik. Biz hammasini yo‘qotdik, deydi Adel al-Shaer hayit namozidan so‘ng.
U Isroil hujumlari oqibatida katta oilasining 20 a’zosidan ayrilgan, jumladan, bir necha kun oldin to‘rt nafar yosh jiyanlari ham olamdan o‘tgan.
Yahudiy davlati bosh vaziri Binyamin Netanyaxu urushni tugatish bo‘yicha muzokaralarga tayyor ekanliklarini aytmoqda. Ammo u HAMASni qurollarni tashlab, G’azo sektorini tark etishga chaqirmoqda. Shundan so‘ng Isroil falastinliklarni “ixtiyoriy ko‘chirish” rejasini boshlaydi.
Mazkur reja AQSH prezidenti Donald Tramp tomonidan ilgari surilgan. Siyosatchi falastinlik qochqinlarni arab davlatlariga ko‘chirishni taklif qilgandi. HAMAS va arab davlatlari bunga javoban hech kim falastinliklarni o‘z yurtidan quvib chiqarishga haqli emasligini qayd etgan.
G‘azodagi urush oktyabr oyida HAMAS Isroilga hujum qilganida boshlandi. 2023-yil 7-iyulda 1200 ga yaqin odam, asosan tinch aholi halok bo‘ldi va 251 kishi garovga olindi. HAMAS hamon 59 nafar garovdagilarni ushlab turibdi, ularning 24 nafari tirik deb taxmin qilinmoqda.
Isroil hujumlari oqibatida 50 mingdan ortiq falastinlik halok bo‘ldi. Ularning aksariyati ayollar va bolalardir. Isroil 20 mingga yaqin HAMAS jangchilarini o‘ldirganini da’vo qilmoqda.
Isroil G‘azo sektoriga hujumlarni qayta tiklagan
Ikki oy davom etgan o‘t ochishni to‘xtatish bo‘yicha kelishuvdan keyin, 18-martga o‘tar kechasi Isroil G‘azoga aviazarbalar berishni tikladi. HAMAS nishonga olinishi aytilgan hujumlarda 400 dan ortiq odam halok bo‘ldi, ularning aksariyati bolalar va ayollar hisoblanadi. Bundan tashqari, 560 dan ortiq kishi jarohatlangan. Hujumni qayta tiklash buyrug‘i Isroil bosh vaziri Binyamin Netanyaxu va mudofaa vaziri Isroil Kats tomonidan berilgan.
Ular o‘t ochishni to‘xtatish rejimini uzaytirish bo‘yicha muzokaralarda oldinga siljish yo‘qligiga javoban shunday qaror qabul qilganini aytgan. Netanyaxu muzokaralarda oldinga siljish yo‘qligi uchun aybni to‘g‘ridan to‘g‘ri HAMASga yuklagan.
Kelishuvning ikkinchi bosqichi Isroildan o‘z kuchlarini G‘azodan olib chiqishni talab qilardi. Hatto 19-yanvarda kuchga kirgan va Isroil qamoqxonalaridagi falastinliklar evaziga garovdagilar ozod etilgan birinchi bosqichda ham Isroil G‘azoda 150 dan ortiq falastinlikni o‘ldirdi.
Isroil bosh vaziri G‘azodagi “barcha kutilmagan qurbonlar” uchun HAMAS javobgar ekanini da’vo qilgan. U G‘azoda yuzlab odam o‘limiga sabab bo‘lgan hujumlar “faqat boshlanishi” ekanini ta’kidlagan. Bundan tashqari Isroil G‘azoda quruqlikdagi operatsiyani qayta boshlagan. Yahudiy davlati G‘azo sektorining shimoliy va janubiy qismlari o‘rtasida bufer zona yaratmoqchi.
Izoh (0)