AQSH prezidenti Donald Tramp 4-mart kuni Kanada va Meksika tovarlariga qo‘shimcha 25 foiz tarif joriy qildi. Bunga javoban Kanada ham AQSHdan eksport qilingan tovarlarga 25 foizlik bojlar qo‘lladi. Bu haqda Al Jazeera xabar berdi.
Amerika 21 kun ichida bojlarni olib tashlamasa, 125 milliard Kanada dollari miqdoridagi AQSH importiga yana 25 foizlik boj joriy etilishi mumkin. Tahlilchilar prognozlariga ko‘ra, AQSH ushbu tariflarni bekor qilgan taqdirda ham, boshqa ko‘plab yig‘imlar evaziga inflyatsiya darajasi yuqoriligicha qolaveradi.
Bundan tashqari, Kanada hozirgacha e’lon qilgan tariflaridan tashqari, AQSHga elektr energiyasi eksportiga tariflar joriy etishni ham ko‘rib chiqmoqda. Mutaxassislar Trampning tariflari Kanadada 1,5 million ish o‘rnini qisqartirib, Kanada iqtisodiyotini turg‘unlik holatiga olib kelishini prognoz qilmoqda.
Kanada bosh vaziri Jastin Tryudoning aytishicha,Tramp ushbu bojlarni Kanada iqtisodiyotining butunlay qulashiga sabab bo‘lishi yo‘lida joriy qilgan, chunki bu mamlakatni anneksiya qilishni osonlashtiradi.
Bu yerda gap faqat tariflar haqida emas. Biz guvohi bo‘layotgan vaziyatda eng bezovta qiluvchi jihat Kanada va AQSH o‘rtasidagi munosabatlardir. Shu sababli hozir Kanadada ekzistensial kurash avj olgan. Bu barcha provinsiyalar va partiyalar yetakchiligini talab qilmoqda, chunki ertaga nima bo‘lishini hech kim bilmaydi, dedi Kanadaning Osiyo-Tinch okeani jamg‘armasining tadqiqot va strategiya bo‘yicha vitse-prezidenti Najibulla .
Najibullaning ta’kidlanishicha, hozirgi taranglik faqat savdo bilan chegaralanadimi yoki tashqi siyosat, mudofaa va xavfsizlik choralari kabi boshqa sohalarga ham xavf soladimi, noma’lum.
Tramp, shuningdek, Meksikaga ham 25 foizlik tariflarni joriy etdi. Xitoyning tariflarini esa ikki baravar oshirib, 20 foizga ko‘tardi. Meksika bunga javob qaytarishga va’da berdi.
Xitoy 10-martdan boshlab AQSHning ayrim import mahsulotlariga 10 foizdan 15 foizgacha boj joriy etishini e’lon qildi, shuningdek, AQSHning belgilangan subyektlari uchun bir qator yangi eksport cheklovlarini joriy etdi. Shuningdek, AQSH ustidan Jahon savdo tashkilotiga shikoyat qildi.
Ammo yalpi tariflar bekor qilingan taqdirda ham, yanada moslashtirilgan tariflar saqlanib qolishi va o‘z navbatida inflyatsiyani keltirib chiqarishi mumkin, bu esa barcha ishtirokchi mamlakatlar iqtisodiyotiga zarar yetkazadi.
Iqtisodiy ta’sir barcha tomonlar uchun sezilarli bo‘ladi, chunki narxlar va inflyatsiya oshadi va biznes nafaqat ushbu tariflar orasida, balki kelgusida o‘rnatiladigan boshqa tariflar bilan ham qiynalmoqda, dedi Yangi Amerika xavfsizligi markazi katta ilmiy xodimi Reychel Zimba.
AQSH savdo vaziri Xovard Lutnik 4-mart kuni Fox Business telekanaliga bergan intervyusida Tramp Kanada va Meksika bilan tariflar bo‘yicha o‘rta darajaga yetishini va bu haqda 5-mart kuni e’lon qilinishi kutilayotganini aytgandi.
Qanday murosaga erishilishidan qat’i nazar, bu Shimoliy Amerika savdo sheriklari o‘rtasidagi munosabatlarga yetkazilgan zararni to‘liq tiklamaydi, dedi Zimba.
Izoh (0)