AQSH prezidenti Donald Tramp avtomobillar importiga 25 foizlik bojlar joriy etilishini ma’lum qildi. Bu haqda Bloomberg xabar berdi.
Gap AQSHda ishlab chiqarilmaydigan barcha mashinalar haqida ketmoqda. Tariflar 2-apreldan kuchga kiradi. Bu AQSHga yiliga 100 milliard dollar daromad keltirishi kutilmoqda. Trampning qarori fonida General Motors Co. va Ford Motor Co. aksiyalari 5 foizdan ko‘proqqa arzonlashdi.
Prezident yangi bojlar bo‘yicha avtomobil ishlab chiqaruvchilarning “katta uchligi” — Ford, General Motors va Stellantis vakillari bilan muzokara o‘tkazganini aytdi.
Agar bu yerda zavodlaringiz bo‘lmasa, ularni qurishingizga to‘g‘ri keladi, aks holda ular boj to‘lashiga to‘g‘ri keladi, hammasi juda oddiy, dedi u.
Trampning so‘zlariga ko‘ra, “katta uchlik”ning aksariyat kompaniyalari allaqachon Qo‘shma Shtatlarda zavodlarga ega va, shuningdek, ehtiyot qismlarni ishlab chiqarish bo‘linmalarini AQSHga ko‘chirmoqchi.
Oq uy matbuot kotibining birinchi o‘rinbosari Harrison Fildsning aniqlik kiritishicha, 25 foizlik bojlar quyidagilarga tatbiq etiladi: import qilinadigan yengil avtomobillar (sedanlar, yo‘ltanlamaslar, krossoverlar, minivenlar va furgonlar), yengil yuk mashinalari, dvigatellar va elektr komponentlar kabi asosiy avtomobil qismlari.
Kanada bosh vaziri Mark Karni AQSH prezidenti qarorini “to‘g‘ridan to‘g‘ri hujum” deb atadi. Uning so‘zlariga ko‘ra, Ottava javob variantlarini, jumladan, ehtimoliy bojlarni ko‘rib chiqadi.
Yevrokomissiya rahbari Ursula fon der Lyayen yangi tariflardan afsusda ekanini bildirdi.
Yevropa ittifoqi o‘z iqtisodiy manfaatlarini himoya qilgan holda muzokaralar yo‘li bilan yechim izlashda davom etadi, dedi u.
Mart oyida Tramp Meksika va Kanadadan import uchun 25 foizlik bojlarni joriy qildi, ammo ularni erkin savdo shartnomasi (USMCA) doirasidagi tovarlar, jumladan, avtomobillar va ehtiyot qismlar uchun bir oyga kechiktirgandi.
Izoh (0)