Amerikaning Comex birjasida oltin narxi bir troya unsiya uchun 2901 dollardan oshdi. Bu tarixdagi rekord ko‘rsatkich hisoblanadi.
Chikago tovar birjasida aprel oyidagi oltin fyucherslari 0,89 foizga ko‘tarildi. Avvalgi rekord 3-fevral kuni qayd etilgan bo‘lib, o‘shanda narx 2 ming 872 dollarga baholangandi. 31-yanvarda esa oltin bir troya unsiya uchun 2850 dollardan oshgan. Narxning oshishi AQSH va Xitoy o‘rtasidagi savdo ziddiyatlarining kuchayishi fonida xavfsiz aktivlarga bo‘lgan talab bilan bog‘liq.
AQSH prezidenti Donald Tramp 1-fevral kuni Kanada, Meksika tovarlariga 25 foizgacha, Xitoynikiga esa 10 foizgacha bojlar joriy qildi. Bunga javoban Xitoy AQSHning ko‘mir va suyultirilgan gaziga 15 foiz, neft, qishloq xo‘jaligi texnikasi hamda avtomobillarga 10 foiz boj soldi.
Bundan tashqari, Pekin tarkibida volfram, tellur, ruteniy va molibden bo‘lgan materiallar ustidan eksport nazoratini kuchaytirdi. Calvin Klein, Tommy Hilfiger va Van Heusen brendlariga egalik qiluvchi PVH Corp va genetik testlash sohasidagi mahsulot hamda xizmatlar yetkazib beruvchi Illumina Inc.ni “ishonchsiz” tashkilotlar ro‘yxatiga kiritdi.
AQSH savdo siyosatidagi noaniqliklar Meksika va Kanada bilan munosabatlarga ham ta’sir ko‘rsatdi. Dastlab ushbu mamlakatlardan import uchun 25 foizlik bojlar joriy etish rejalashtirilgandi, biroq vaqtinchalik kelishuvdan so‘ng tariflarni joriy etish kamida bir oyga kechiktirildi. Shunga qaramay, savdo munosabatlaridagi noaniqlik oltinga bo‘lgan yuqori talabni saqlab qolishda davom etmoqda, deydi ING tovar strategiyasi bo‘limi boshlig‘i Uorren Patterson.
Ekspertlarning fikricha, bojlar va savdo cheklovlari yanada kengayishi bozorlarda o‘zgaruvchanlikning kuchayishiga olib kelishi mumkin. Bunday sharoitda an’anaviy himoya aktivi hisoblangan oltin, dollarning mustahkamlanishiga qaramay, qimmatlashishda davom etadi. Oltin ko‘pincha investorlar tomonidan inflyatsiya va geosiyosiy beqarorlikdan himoya qilish vositasi sifatida foydalanadi.
O‘zbekistonda oltin quymalar narxi rekord darajada oshdi
Bir gramm oltin hozirda 1 million 197 ming 760 so‘mga baholanmoqda. Besh grammlik oltin quymaning narxi 5 million 989 ming so‘mni tashkil qilmoqda.
O‘zbekistonda 2025-yil 17-yanvardan boshlab 100 grammlik oltin quymalar ham sotuvga chiqarildi. Ularning narxi 3-fevral holatiga ko‘ra 119 million 776 ming so‘mni tashkil qilmoqda.
- 10 gramm oltin quyma narxi 11 million 978 ming som;
- 20 gramm oltin quyma narxi 23 million 955 ming so‘m;
- 50 gramm oltin quyma narxi 59 million 888 ming so‘mga teng bo‘ldi.
Oltin quymalar nima va ulardan qanday foydalanish mumkin?
Oltin quymalar — og‘irligi 5, 10, 20, 50, 100 gramm bo‘lgan, 999,9 soflikdagi oltindan tayyorlangan quymalar. Maxsus himoya qadoqlarida sotuv uchun taqdim etiladi. Oltin quymalarning qadog‘i sertifikat vazifasini bajaradi va o‘z seriya raqamiga ega bo‘ladi.
Oltin quymalari himoyalangan qadoqlarda sotiladi va ularni bemalol uyda yoki bankda — individual bank yacheykalarini ijaraga olgan holda saqlash mumkin. Ularning narxi bir hafta ichida bir necha marta o‘zgarishi mumkin. Oltin quymalarini faqat banklarga sotish mumkin.
Izoh (0)