Isroil bosh vaziri Binyamin Netanyaxu G‘azodagi urushning tugatishni muhokama qilishga tayyor ekanliklari aytdi va buning uchun shart qo‘ydi. Bu haqda The Times of Israel xabar berdi.
Netanyaxuning ta’kidlashicha, buning uchun HAMAS harakati qurolini tashlab, sektorni tark etishi kerak. Isroil esa G‘azoda umumiy xavfsizlikni ta’minlash va AQSH prezidenti Donald Trampning rejasini, ya’ni ixtiyoriy emigratsiya dasturini amalga oshirish majburiyatini o‘z zimmasiga oladi.
Tramp avvalroq Vashington G‘azoni o‘z nazoratiga olishga tayyorligini aytgan edi. Uning so‘zlariga ko‘ra, Falastin aholisini boshqa hududlarga ko‘chirish, eksklavni vayron bo‘lgan binolardan tozalash va yangi ish o‘rinlari va uy-joy bilan ta’minlaydigan iqtisodiy rivojlanish markaziga aylantirish kerak.
Bu bizning rejamiz. Biz buni yashirmaymiz va istalgan vaqtda uni muhokama qilishga tayyormiz, dedi Isroil bosh vaziri.
Shuningdek, u Isroil G‘azo sektoridan garovga olinganlarni ozod qilish bo‘yicha vositachilar orqali muzokaralarni davom ettirayotganini ta’kidladi. Muzokaralar “o‘t ochish” fonida olib borilmoqda. Chunki Isroil garovdagilarni ozod qilish uchun HAMASga harbiy bosimni kuchaytirish “samarali” deb hisoblaydi.
Isroil G‘azo sektoriga hujumlarni qayta tiklagan
Ikki oy davom etgan o‘t ochishni to‘xtatish bo‘yicha kelishuvdan keyin, 18-martga o‘tar kechasi Isroil G‘azoga aviazarbalar berishni tikladi. HAMAS nishonga olinishi aytilgan hujumlarda 400 dan ortiq odam halok bo‘ldi, ularning aksariyati bolalar va ayollar hisoblanadi. Bundan tashqari, 560 dan ortiq kishi jarohatlangan. Hujumni qayta tiklash buyrug‘i Isroil bosh vaziri Binyamin Netanyaxu va mudofaa vaziri Isroil Kats tomonidan berilgan.
Ular o‘t ochishni to‘xtatish rejimini uzaytirish bo‘yicha muzokaralarda oldinga siljish yo‘qligiga javoban shunday qaror qabul qilganini aytgan. Netanyaxu muzokaralarda oldinga siljish yo‘qligi uchun aybni to‘g‘ridan to‘g‘ri HAMASga yuklagan.
Kelishuvning ikkinchi bosqichi Isroildan o‘z kuchlarini G‘azodan olib chiqishni talab qilardi. Hatto 19-yanvarda kuchga kirgan va Isroil qamoqxonalaridagi falastinliklar evaziga garovdagilar ozod etilgan birinchi bosqichda ham Isroil G‘azoda 150 dan ortiq falastinlikni o‘ldirdi.
Isroil bosh vaziri G‘azodagi “barcha kutilmagan qurbonlar” uchun HAMAS javobgar ekanini da’vo qilgan. U G‘azoda yuzlab odam o‘limiga sabab bo‘lgan hujumlar “faqat boshlanishi” ekanini ta’kidlagan. Bundan tashqari Isroil G‘azoda quruqlikdagi operatsiyani qayta boshlagan. Yahudiy davlati G‘azo sektorining shimoliy va janubiy qismlari o‘rtasida bufer zona yaratmoqchi.
Izoh (0)