AQSH prezidenti Donald Tramp agar rossiyalik hamkasbi Vladimir Putin urushni to‘xtatishga rozi bo‘lmasa, Rossiya neftiga 25 foizlik ikkilamchi boj joriy etishidan ogohlantirdi. Bu haqda siyosatchi NBC News’ga bergan intervyusida ma’lum qildi.
Uning so‘zlariga ko‘ra, 25 foiz miqdoridagi bojlar istalgan vaqtda joriy etilishi mumkin va agar kelishuv tuzilmasa, bir oy ichida kuchga kiradi.
Agar Rossiya bilan Ukrainadagi qon to‘kilishini to‘xtatish bo‘yicha kelishuvga erisha olmasam va buning sababchisi Rossiya deb hisoblasam (garchi bunday bo‘lmasligi ham mumkin), lekin agar men buni Rossiyaning aybi deb o‘ylasam, Rossiyadan chiqadigan barcha neftga ikkilamchi bojlar joriy qilaman. Bu shuni anglatadiki, agar siz Rossiyadan neft sotib olsangiz, AQSHda biznes yurita olmaysiz.
O‘t ochishni to‘xtatish to‘g‘risida kelishuv bo‘lmasa, bir oy ichida bojlarni joriy etaman. Putin g‘azablanganimni biladi, lekin biz u bilan “juda yaxshi munosabatdamiz” va agar Putin to‘g‘ri ish qilsa, g‘azabim tezda tarqaladi, deya ta’kidladi Tramp.
Shuningdek, AQSH rahbari kelgusi hafta Putin bilan muloqot qilishni rejalashtirayotganini qayd etdi. Tramp saylovoldi kampaniyasida prezidentlikka kirishgach Ukrainadagi urushni 24 soat ichida tugatishga va’da bergandi. Ikkinchi prezidentlik muddatining dastlabki bir necha oyida AQSH, Ukraina va Rossiya rasmiylari o‘rtasida uchrashuvlar bo‘lib o‘tdi.
O‘tgan hafta Rossiya va Ukraina Qora dengizda xavfsiz harakatlanish va bir-birining energetika obyektlariga hujumlarni to‘xtatish imkonini beruvchi qisman va cheklangan o‘t ochishni to‘xtatish to‘g‘risida kelishib oldi.
Izoh (0)