Yevropa ittifoqi Amerika bojlarini Yevropa eksportiga nisbatan asossiz deb hisoblamoqda. Yevrokomissiya AQSHning YIdan keltirilayotgan po‘lat va alyuminiyga qo‘yishi mumkin bo‘lgan bojlariga javob berishga va’da berdi, ularni oqlab bo‘lmasligini ta’kidladi.
-YdTNQBm_.jpg)
Hozirgi vaqtda YI tovarlariga bojxona to‘lovlari joriy etilgani haqida hech qanday rasmiy xabar olmadik. Biz tafsilotlarsiz yoki yozma tushuntirishlarsiz umumiy bayonotlarga javob bermaymiz. Yevropa ittifoqi o‘z eksportiga tariflar joriy etish uchun hech qanday asos ko‘rmayapti. Biz Yevropa biznesi, ishchilari va iste’molchilari manfaatlarini himoya qilish uchun chora ko‘ramiz, deyiladi Yevrokomissiya bayonotida.
Hujjatda ta’kidlanishicha, bojlarni joriy etish “ayniqsa, YI va AQSH transatlantik savdo va investitsiyalar orqali yaratgan chuqur integratsiyalashgan ishlab chiqarish zanjirlarini hisobga olgan holda qonunga zid va iqtisodiy jihatdan samarasiz bo‘lar edi”.
Yevrokomissiya fikricha, Yevropaga qarshi bojlarni joriy etish orqali AQSH o‘z fuqarolari manfaatlariga zid ish tutadi, biznes uchun xarajatlarni oshiradi va inflyatsiyani kuchaytiradi.
Bundan tashqari, bojxona to‘lovlari iqtisodiy beqarorlikni kuchaytiradi hamda jahon bozorlarining samaradorligi va integratsiyasiga putur yetkazadi, deya ta’kidlanadi hujjatda.
Avvalroq Fransiya TIV rahbari Jan-Noel Barro TF1 telekanaliga Fransiya va YI AQSH prezidenti Donald Tramp tomonidan Yevropa tovarlariga bojlar joriy etilishi holatiga javob berishga tayyor ekanligini ma’lum qilgandi.
Bu kutilmagan hol emas. Tramp buni 2018-yilda ham qilgan va biz o‘shanda bunga munosabat bildirgan edik. Bu safar ham munosabat bildiramiz, dedi vazir.
Yevropaning qaysi turdagi tovarlarga javoban chora ko‘rishi mumkinligi haqidagi savolga vazir YIning tegishli chora-tadbirlari qo‘llanadigan sohalarni Yevrokomissiya belgilashi kerakligini aytdi. Uning so‘zlariga ko‘ra, Yevrokomissiya YI davlatlarini bunday choralarni “kerakli paytda qo‘llashga tayyor bo‘lishiga” ishontirgan.
Biroz avval Tramp joriy yilning 10-fevralidan boshlab AQSHga import qilinadigan po‘lat va alyuminiyga 25 foizlik boj joriy etish niyatida ekanini ma’lum qilgandi.
Po‘latga 25 foiz boj qo‘yiladi, alyuminiyga ham, dedi prezident.
Bundan tashqari, u 11 yoki 12-fevral kunlari AQSH tovarlariga bojlar qo‘llaydigan AQSH savdo hamkorlariga nisbatan bojlarni e’lon qilishini ma’lum qildi.
Ular deyarli darhol kuchga kiradi, deya xulosa qildi Tramp savdo hamkorlariga nisbatan bojlar haqida gapirar ekan.
Bojlar avval ham qo‘llanilgan
Tramp o‘zining birinchi prezidentlik muddatida ham metallarga bojlar qo‘llagan. 2018-yilda u Kanada va Meksikadan tashqari barcha mamlakatlardan po‘lat importi uchun 25 foizlik va alyuminiy importi uchun 10 foizlik bojlarni o‘rnatdi. Biroq keyinchalik ular uchun ham bojlar joriy etildi, biroq 2019-yilda bekor qilingandi.
Siyosatchi 2018-yilda Amerika sanoati boshqa mamlakatlar tomonidan qo‘llaniladigan tashqi savdoning tajovuzkor usullari bilan “vayron bo‘lganini” ta’kidlagandi. Misol tariqasida u hozirda eng yaqin hamkori bo‘lgan biznesmen Ilon Maskning ma’lumotlarini keltirgan. Unga ko‘ra, Amerika avtomobillarini Xitoyga olib kirish 25 foiz, Xitoy avtomobillarini AQSHga olib kirish esa 2,5 foiz bojga tortilgan.
O‘sha yili Tramp Anqara bilan “yaxshi bo‘lmagan” munosabatlar tufayli turk po‘lati va alyuminiysiga nisbatan choralarni kuchaytirdi, bojlarni ikki baravar oshirdi. Vaziyatning yomonlashishi Amerika diplomatik missiyasining ba’zi xodimlarining hibsga olinishi fonida yuz berdi.
2021-yilda, sobiq prezident Jo Bayden davrida, Yevropa ittifoqi va AQSH bojlar masalasini hal qildi. Biroq 2024-yilda uning ma’muriyati ham bojlarni joriy etdi: Meksikada eritilmagan yoki quyilmagan po‘latga 25 foiz, alyuminiyga esa 10 foiz miqdorida boj belgilandi.
Izoh (0)