Donald Trampning boj tariflari investorlarni vahimaga solib, o‘z aksiyalarini keng ko‘lamda sotishga undadi. Natijada S&P 500 indeksi o‘tgan oydagi eng yuqori ko‘rsatkichga nisbatan 4 trillion dollarga pasaydi.
Mutaxassislarning ta’kidlashicha, Trampning tarif siyosati Amerika bizneslari, iste’molchilari va investorlari orasida mavhumlikni kuchaytirgan. Bozordagi ishonchga, ayniqsa, Kanada, Meksika va Xitoy kabi yirik savdo hamkorlari bilan bojxona to‘lovlari borasidagi keskinlik jiddiy ta’sir ko‘rsatmoqda.
Wealth Enhancement kompaniyasi mutaxassisi Ayako Yoshioka bozor kayfiyatida sezilarli o‘zgarishlar kuzatilayotganini qayd etib, ilgari samarali bo‘lgan yondashuvlar endilikda ish bermayotganini aytdi.
Dushanba kuni fond bozoridagi sotuvlar yanada kuchaydi. S&P 500 indeksi 2,7 foizga pasayib, yilning eng yirik kunlik yo‘qotishini qayd etdi.
Texnologik kompaniyalar ustunlik qiladigan Nasdaq Composite esa 4 foizga qulab, 2022-yil sentyabridan beri eng katta kunlik pasayishni ko‘rsatdi. Natijada S&P 500 joriy yilning 19-fevralida qayd etilgan rekord cho‘qqisidan 8,6 foiz pastga tushib, bozor qiymatidan 4 trillion dollardan ortig‘ini yo‘qotdi. Nasdaq fond birjasi esa dekabrdagi eng yuqori darajasidan 10 foizdan ortiqqa tushib, texnik jihatdan “korreksiya” bosqichiga kirdi.
Tramp o‘tgan dam olish kunlari iqtisodiy inqiroz yuzaga kelishi ehtimoli haqida aniq prognoz bermaslikka harakat qildi. Biroq investorlar uning savdo siyosati salbiy iqtisodiy oqibatlarga olib kelishidan xavotirda.
Xitoy bilan savdo kelishmovchiliklarini tushunish mumkin, biroq Kanada, Meksika va Yevropa bilan tarif mojarolari ancha chalkashlik tug‘diryapti. Agar muammolar tez orada hal qilinmasa, bu AQSH iqtisodiy istiqbollari va birlashma-sotib olish (M&A) faoliyatiga jiddiy zarar yetishi mumkin, dedi Lazard kompaniyasi bosh direktori Piter Orzag.
Bozor pasayishining ta’siri kompaniyalarga ham sezilmoqda. Delta Air Lines birinchi chorakdagi foyda prognozini ikki baravar qisqartirdi, natijada uning aksiyalari 14 foizga quladi. Bosh direktor Ed Bastian bunga Qo‘shma Shtatlardagi iqtisodiy noaniqlikning kuchayishini sabab qilib ko‘rsatgan.
Investorlar, shuningdek, 12-mart kuni e’lon qilinadigan inflyatsiya hisobotini ham diqqat bilan kutishmoqda.
Boshqa prezidentlik ma’muriyatlari odatda fond bozoriga sezilarli ta’sir ko‘rsatishdan qochardi, ammo Tramp ma’muriyati bunga nisbatan loqaydroqdek ko‘rinmoqda. Ular fond bozorining tushishiga va hattoki iqtisodiy turg‘unlik ehtimoliga ko‘proq tayyor bo‘lishi mumkin. Bu esa Uoll Strit uchun sergaklantiruvchi jiddiy signal bo‘lishi kerak, deydi Baird kompaniyasining investitsiya strategiyasi bo‘yicha mutaxassisi Ross Mayfild.
Mutaxassislar fond bozoridagi tushkun kayfiyat AQSH yalpi ichki mahsulotining qisqarishiga olib kelishidan xavotirda.
Izoh (0)