AQSH prezidenti Xitoy tovarlariga 10 foizlik boj joriy qilishini aytgan edi. Xitoy ham AQSHning qishloq xo’jaligi mahsulotlariga xuddi shunday javob bojlari kiritmoqchi. Bu haqda Reuters xabar berdi.
Javob bojlari AQSH iqtisodiyotiga sezilarli darajada salbiy ta’sir ko’rsatishi mumkin. Chunki bugungi kunda Xitoy davlat qishloq xo’jaligi eksporti uchun eng katta bozor bo’lib qolmoqda.
2018-yildan buyon import hajmi pasayganiga qaramay, AQSHning soya, go‘sht va don kabi asosiy qishloq xo‘jaligi mahsulotlariga qo‘yiladigan har qanday bojlar AQSH-Xitoy savdosiga, shuningdek, AQSH eksportchilari va fermerlariga jiddiy ta’sir ko‘rsatishi mumkin. Nazariy jihatdan, muqobil bozorlarni topish osonroq bo‘lishi kerak. Ammo amalda vaziyat ancha murakkab bo‘lishi mumkin, dedi Oksford global jamiyati tadqiqotchisi Jeneviev Donnellon-May.
Dunyodagi eng yirik qishloq xo‘jaligi importchisi va ikkinchi yirik iqtisodiyot hisoblangan Xitoy 2024-yilda 29,25 milliard dollarlik AQSH qishloq xo‘jaligi mahsulotlarini import qildi. Bu ko‘rsatkich bir yil avvalgiga nisbatan 14 foizga past bo‘lib, 2023-yildagi 20 foizlik pasayishni davom ettirdi.
AQSH va Xitoy o'rtasidagi munosabatlar hozirda juda keskinlashgan. Xususan, Tayvan masalasi AQSH-Xitoy munosabatlaridagi eng katta muammo hisoblanadi. Xitoy Tayvanni o'z hududining bir qismi deb biladi va AQSHning orol mustaqilligini qo‘llab-quvvatlamasligini talab qiladi.
AQSH Harbiy-havo kuchlari generali Maykl Minihan 2025-yilda Xitoy bilan urush boshlanishi haqida prognoz qilgan edi. Ammo bunga hech qanday dalil keltirmagan. Bundan tashqari Xitoy tashqi ishlar vaziri Sin Gan ham AQSH bilan diplomatik munosabatlar eng past darajaga tushganini ta'kidladi. U AQSHni xolis pozitsiyani saqlashga chaqirdi.
Yana bir muhim jihat shundaki, bugungi kunda Xitoy AQSHga nisbatan savdo urushi fonida AQSH texnologiyalarini davlatga kirishini ham cheklagan.
Izoh (0)