AQSH prezidenti Donald Tramp butun dunyodan, shu jumladan, yirik savdo hamkorlaridan AQSHga po‘lat va alyuminiy importiga yangi 25 foizlik bojlar joriy etilishini aytdi. Bu haqda The Guardian xabar berdi.
AQSH prezidenti barcha mamlakatlardan import qilinadigan metallarga tariflar ta’sir qilishini aytdi, ammo ular aynan qaysi sanadan kuchga kirishini ko‘rsatmadi. U, shuningdek, “o‘zaro tariflar” joriy etilishini ta’kidladi. Agar qaysidir davlat Amerika tovarlariga boj solsa, AQSH ham o‘sha mamlakatdan kelayotgan tovarlarga import bojlarini joriy etadi.
“Hammasi juda oddiy: agar ular bizdan haq olsa, biz ham ulardan haq olamiz. Agar ular bizdan 130% olsa-yu, biz ulardan hech narsa olmasak, bu holat davom etishi mumkin emas”, dedi u.
Po‘lat va alyuminiyga bojlar joriy etilishi haqidagi xabar Kanadaning Ontario provinsiyasi bosh vaziri Dag Fordning keskin munosabatiga sabab bo‘ldi. U AQSH prezidentini iqtisodiyotni xavf ostiga qo‘yadigan “maqsadlarni muntazam o‘zgartirish va doimiy tartibsizlik yaratish”da aybladi.
Bojlar avval ham qo‘llanilgan
Tramp o‘zining birinchi prezidentlik muddatida ham metallarga bojlar qo‘llagan. 2018-yilda u Kanada va Meksikadan tashqari barcha mamlakatlardan po‘lat importi uchun 25 foizlik va alyuminiy importi uchun 10 foizlik bojlarni o‘rnatdi. Biroq keyinchalik ular uchun ham bojlar joriy etildi, biroq 2019-yilda bekor qilingandi.
Siyosatchi 2018-yilda Amerika sanoati boshqa mamlakatlar tomonidan qo‘llaniladigan tashqi savdoning tajovuzkor usullari bilan “vayron bo‘lganini” ta’kidlagandi. Misol tariqasida u hozirda eng yaqin hamkori bo‘lgan biznesmen Ilon Maskning ma’lumotlarini keltirgan. Unga ko‘ra, Amerika avtomobillarini Xitoyga olib kirish 25 foiz, Xitoy avtomobillarini AQSHga olib kirish esa 2,5 foiz bojga tortilgan.
O‘sha yili Tramp Anqara bilan “yaxshi bo‘lmagan” munosabatlar tufayli turk po‘lati va alyuminiysiga nisbatan choralarni kuchaytirdi, bojlarni ikki baravar oshirdi. Vaziyatning yomonlashishi Amerika diplomatik missiyasining ba’zi xodimlarining hibsga olinishi fonida yuz berdi.
2021-yilda, sobiq prezident Jo Bayden davrida, Yevropa ittifoqi va AQSH bojlar masalasini hal qildi. Biroq 2024-yilda uning ma’muriyati ham bojlarni joriy etdi: Meksikada eritilmagan yoki quyilmagan po‘latga 25 foiz, alyuminiyga esa 10 foiz miqdorida boj belgilandi.
Izoh (0)