Faoliyat ko‘rsatmayotgan g‘olib, yaqin qarindoshlar va qo‘shnilar bahsi — o‘tgan haftada o‘tkazilgan tenderlarga nazar

Shu yilning 17—23-fevral kunlari O‘zbekiston Respublikasi tovar-xomashyo birjasida mingdan ortiq tenderlar amalga oshirildi. “Daryo” muxbiri Umidjon Mamarasulov hujjatlarni monitoring qilib, e’tiborga molik savdolar haqida ma’lumot beradi.

Mahalladoshlar bahsi

Toshkent shahar hokimligining Ma’rifat markazi binosidan foydalanish va binoga tutash hududga xizmat bo‘yicha ixtisoslashtirilgan direksiyasi boshlang‘ich qiymati 119 million 340 ming so‘mlik tender o‘tkazgan. Unda “SS-Clean”, “Mir Shox Sam Du” va “Clean-Way” MCHJlar g‘oliblik uchun kurashgan. Yakunda “Mir Shox Sam Du” korxonasi 119 million 142 ming so‘m bilan tenderni yutib olgan.

G‘olib 30 kun davomida “Ma’rifat markazi” binosining fasadi, oynalari, vitrinasi, alyuminiy profilini alpinistlar yordamida maxsus kimyoviy vositalar bilan tozalashi zarur.

E’tiborlisi, ikki ishtirokchi “Mir Shox Sam Du” va “Clean-Way” MCHJlar Bekobod tumanining Xos shaharchasi O.Tojiboyev ko‘chasida joylashgan. 

Raqobatchilar qarindosh?!

“Navoiy viloyati hududiy yashil hudud” unitar korxonasi “Yashil hudud” DUK 6—18-fevral kunlari Zarafshon shahrida “Mening bog‘im” loyihasi asosida “Yashil bog‘” barpo etish ishlari bo‘yicha uchta tender o‘tkazdi. Boshlang‘ich qiymati 30,9 million so‘m bo‘lgan Eng yaxshi taklifni tanlashda ikkita — “Rimit-Plast” xususiy korxonasi va “Elektronur” mas’uliyati cheklangan jamiyati qatnashgan.

Ishtirokchi korxonalarning ma’lumotlarini ko‘zdan kechirish davomida ularning ta’sischilari e’tiborimizni tortdi. “Rimit-Plast” Navoiy shahrida joylashgan bo‘lib, ta’sischisi Rustamov Baxriddin Tog‘aymurodovich hisoblanadi. Samarqand viloyatining Paxtachi tumanidan ro‘yxatdan o‘tgan “Elektronur” mas’uliyati cheklangan jamiyatining 81 foiz ulushi esa Rustamov Nuriddin Tog‘aymurodovich va Rustamov Uchqun Tagaymurodovichga tegishli. Korxonalar boshqa-boshqa hududlarda joylashsa-da, ta’sischilar o‘rtasida qarindoshlik aloqalari bo‘lishi mumkin. 

G‘olib va zaxira g‘olibning manzili bir 

“O‘zbekgeofizika” aksiyadorlik jamiyati korxonaning 430 ta avtotransport vositasi koordinatalarini kuzatib borish xizmatlarini ko‘rsatish bo‘yicha 231,6 million so‘mlik tender o‘tkazgan. Unda “Fleet Management Solutions”, “UZGPS” MCHJlar va “Duopro” xususiy korxonasi raqobatlashib, yakunda birinchi tadbirkorlik subyekti 203 million 820 ming so‘m bilan tenderni yutib olgan.

Tender g‘olibi bo‘lgan “Fleet Management Solutions” MCHJ Toshkent shahri, Mirzo Ulug‘bek tumani, “Asaka” MFY, Mustaqillik shohko‘chasi 88-uyda joylashgan.

Balki tasodifdir, ammo zaxira g‘olibi hisoblangan “Duopro” MCHJ ham aynan shu manzilda joylashgan. 

Yana bir e’tiborli jihati, g‘olib – ma’lumotlarni joylashtirish va ishlov berish bo‘yicha xizmatlar, zaxira g‘olibi esa – elektron va telekommunikatsion uskunalar va ularning ehtiyot qismlari ulgurji savdosi bilan shug‘ullanadi. 

Bundan kelib chiqyaptiki, ushbu ikkala firma o‘zaro aloqador va tenderlarda kelishuv asosida ishtirok etayotgan bo‘lishi mumkin. Bu esa qonun buzilish holati mavjudligidan dalolat beradi.

Ishlamayotgan korxona g‘alaba qozondi

O‘tgan haftada Amu-Surxon irrigatsiya tizimlari havza boshqarmasi huzuridagi Nasos stansiyalari va energetika boshqarmasi tomonidan elektrodvigatellarni mukammal ta’mirlash ishlari bo‘yicha ikkita tanlov o‘tkazdi. Birining boshlang‘ich qiymati 170 million, ikkinchisiniki esa 350 million so‘mni tashkil etadi.

Ikkala tanlovda ham “Mator Tamir” MCHJ hamda “Verfokus” MCHJlar qatnashgan. Birinchi tanlovda eng past narx — 349,9 mln so‘m taklif qilgan “Verfokus” MCHJ, ikkinchisida esa — 169,9 mln so‘m taklif qilgan “Mator Tamir” MCHJ g‘olib deb topilgan. 

Statistika agentligi ma’lumotiga ko‘ra, “Mator Tamir” MCHJ Farg‘ona viloyati, Buvayda tumani, “Tarrachi” MFY, Guldiyor ko‘chasi 866-uyda joylashgan. Shuningdek, ma’lumotda ushbu korxona faoliyat ko‘rsatmayotganligi qayd etilgan. 

E’tiborlisi, “Mator Tamir” MCHJ 5-12-fevral kunlari o‘tkazilgan tenderda ham qatnashib, boshlang‘ich narxdan 100 ming so‘m farq bilan g‘olib bo‘lgan.

“Daryo” mas’ullardan ushbu shubhali tenderlar natijalariga e’tibor qaratishni so‘raydi va o‘tkazilayotgan davlat xaridlarini kuzatishda davom etadi.