2023-yilda davlat buyurtmachilari tomonidan yo‘l qo‘yilgan qonun buzilish holatlarining 70 foizi savdolar o‘tkazishning qonun hujjatlarida belgilangan tartibni buzish bilan bog‘liq. Bu haqda 11-yanvar kuni Toshkent shahrida Raqobatni rivojlantirish va iste’molchilar huquqlarini himoya qilish qo‘mitasi tomonidan o‘tkazilgan matbuot anjumanida ma’lum qilindi, deya xabar bermoqda “Daryo” muxbiri.
Aytilishicha, qonun hujjatlarida belgilangan tartibni buzishga:
- baholash mezonlarini belgilamaslik;
- affillanganlik holatlari;
- noto‘g‘ri baholash;
- shartnoma tuzishni rad etish;
- manfaatlar to‘qnashuvini oldini olmaslik kabi holatlar kiradi.
Shuningdek, 30 foiz holatda savdo ishtirokchilarini asossiz ravishda chetlashtirish:
- ishtirokchilarni asossiz chetlashtirish;
- ayrim ishtirokchilarga imtiyozli shart-sharoitlar yaratib berish;
- haddan ziyod yuqori texnik talablar belgilash;
- yetkazib berish muddatlarini qisqa belgilash;
- savdolarning predmetiga texnologik va funksional jihatdan bog‘liq bo‘lmagan qo‘shimcha xizmatlarni kiritish kabilar tashkil etadi.
Tanlov natijasi qo‘mitaning ko‘rsatmasiga asosan buyurtmachi tomonidan bekor qilinib, takroran o‘tkazilgan yirik tender savdolari:
“Milliy bank” AJ tomonidan boshlang‘ich qiymati 20,4 milliard so‘mga teng bo‘lgan “Andijon viloyatidagi bank filialining yangi binosini qurish” uchun o‘tkazilgan tender;
Xorazm viloyati Bog‘ot tumani obodonlashtirish boshqarmasi tomonidan 5 ta lotda qiymati 5,6 milliard so‘mga teng bo‘lgan maxsus texnikalarni xarid qilish uchun o‘tkazilgan tanlov;
“O‘rta Chirchiq GESlar kaskadi” UK tomonidan o‘tkazilgan maxsus texnik jihozlar xaridi bo‘yicha boshlang‘ich narxi 3 milliard 550 million so‘m bo‘lgan 2 ta lot tanlovi.
Yana bir holatda — Farg‘ona viloyati 2-son tumanlararo ftiziatriya dispanseri tomonidan boshlang‘ich qiymati 970 million so‘m bo‘lgan “Raqamli rentgen apparati flyuorografiya bilan” xaridlarida raqobatni cheklashga olib keladigan talablar kiritilgan. Tanlov natijasi Qo‘mita tomonidan qo‘zg‘atilgan ish doirasida buyurtmachi tomonidan ixtiyoriy bekor qilinib, savdolar takroran o‘tkazilgan.
Yuqorida aniqlangan holatlar yuzasidan qonun buzilishiga yo‘l qo‘ygan 500 ga yaqin mansabdor shaxslar ma’muriy javobgarlikka tortilgan.
Izoh (0)