Xorazm viloyati hokimi o‘rinbosarining ukasiga tegishli kompaniya 20 milliard so‘mlik davlat buyurtmasini yutgani ma’lum bo‘ldi. Bunda hokim o‘rinbosari tender komissiyasi raisi bo‘lgan. Bu haqda Davlat xaridlari portalidagi ma’lumotlarga tayanib, Telegram’dagi “Davletovuz” kanali xabar berdi.
Bahrom Qurbonov 2020-yilning martida Xorazm viloyati hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari etib tayinlangan. U viloyatda qurilish kompleksida pudrat, loyiha ishlariga bo‘lgan davlat buyurtmasini tender asosida joylashtirishni, shuningdek, uning bajarilishi yuzasidan nazoratni ta’minlaydi.
Ma’lumotlarga ko‘ra, 2020-yilning 25-iyun kuni Bahrom Qurbonov raisligida Xorazm viloyati Urganch shahridagi perinatal markazini rekonstruksiya qilish bo‘yicha tender savdo komissiyasi majlisi bo‘lib o‘tgan. Komissiya qiymati 20 milliard so‘mdan ortiq bo‘lgan inshootni qurish uchun “Bunyodkor” MChJni g‘olib sifatida tanlab olgan. Mazkur korxona ulushlari yuridik shaxslar reyestriga ko‘ra to‘lig‘icha Ulug‘bek Qurbonovga taalluqli. “Davletovuz”ning yozishicha, u viloyat hokimi o‘rinbosari, tender komissiyasi raisi Bahrom Qurbonovning yaqin qarindoshi — ukasi hisoblanadi.
Mazkur kompaniya, shuningdek, Urganch shahar “Ashxobod” mahalla fuqarolar yig‘inidagi ichimlik suv tizimlarini qurish va rekonstruksiya qilish bo‘yicha tenderda ham g‘olib bo‘lgan. Tender natijalari 2020-yil sentabr oyida e’lon qilingan. Qariyb 7 milliard so‘mlik obyekt bo‘yicha tender komissiyasi raisi Uy-joy va kommunal xo‘jalik vaziri bo‘lgan, lekin u yig‘ilishda “uzrli sabablarga ko‘ra qatnasha olmagan”.
“Madaniyatli jamiyatlarda bunday davlat buyurtmalarida chinovnikning korxonasi ishtirok etmaydi, hech qachon amaldor ukasi yoki akasi nomidagi kompaniya ishtirok etayotgan tenderda komissiya raisi bo‘lmaydi. Bu absurd. Bu jinoyat. Bu korrupsiya. Yuqoridagi holatlar, nazarimizda, manfaatlar to‘qnashuvi, qonun buzilishi joylarda chuqur ildiz otganini, muammoga tizimli yechimlar izlash kerakligini ko‘rsatmoqda”, — deyiladi xabar ostidagi izohda.
Avvalroq Andijonda davlat buyurtmalarini buyurtmachining o‘ziga tegishli kompaniyalar taqsimlab olgani ma’lum bo‘lgandi. Xususan, “Yagona buyurtmachi xizmati” IK rahbari Muhiddin Qodirov o‘ziga tegishli bo‘lgan Milano Biznes Servis MChJga qariyb 20 milliard so‘mlik qurilishga oid davlat buyurtmalarini olgan. Shuningdek, Jizzaxda bir necha yuz milliard so‘mlik loyihalarni viloyat hokimi o‘rinbosarining qarindoshlari qo‘lga kiritgani hamda viloyati hokimining qiziga tegishli kompaniya ko‘chalarga gul ekish bo‘yicha 1,9 milliard so‘mlik yana bir tenderni yutib olgani ma’lum bo‘lgandi.
Izoh (0)