Korrupsiyaga qarshi kurashish agentligi Sog‘liqni saqlash vazirligi bir korxona taʼsischilari ishtirokida 435 million so‘mlik tender o‘tkazgani masalasini o‘rgandi. Bu haqda agentlik matbuot kotibi Sherzod Saparov maʼlum qildi.
O‘rganishda xarid jarayonida “Davlat xaridlari to‘g‘risida”gi qonunning 42- (ishtirokchini xarid qilish tartib-taomillarida ishtirok etishdan chetlatish shartlari) va 46-moddalari (davlat xaridlari jarayonidagi cheklovlar) talablari buzilgani aniqlanib, to‘plangan hujjatlar qonuniy qaror qabul qilish uchun Iqtisodiyot va moliya vazirligi huzuridagi Davlat moliyaviy nazorati inspeksiyasiga yuborilgan. Agentlik ushbu masala natijasi bo‘yicha qo‘shimcha maʼlumot berilishini qo‘shimcha qilgan.
“Gazeta.uz” nashri Sog‘liqni saqlash vazirligi o‘z ehtiyojlari hamda tibbiyot forumlariga tashrif buyuradigan mehmonlarga sovg‘a qilish uchun kundalik, bloknot, ruchka, papka, qog‘oz paket, fleshka, kanselyariya to‘plami va boshqalarni xarid qilgani, 435 million 700 ming so‘mlik tenderda qatnashgan ikki tadbirkor ham bir korxonaga birgalikda egalik qilishi haqida yozgandi.
Xarid komissiyasi protokoliga ko‘ra, may oyida o‘tkazilgan tenderda ikkita ishtirokchi qatnashgan bo‘lib, ulardan birinchisi Bresso masʼuliyati cheklangan jamiyati hisoblanadi. Mazkur jamiyatning barcha ulushi Jaloliddinov Xusomiddin Xusniddin o‘g‘liga tegishli. Kompaniyaning ustav fondi 2 milliard 245 million 850 ming so‘m bo‘lib, amalga oshirayotgan faoliyat turi sifatida soatlar va ulgurji buyumlar savdosi ko‘rsatilgan. Ikkinchi ishtirokchi esa yakka tartibdagi tadbirkor Mirshavkatov Miraʼzam Anvar o‘g‘li bo‘lgan.
“Orginfo.uz” sayti maʼlumotlariga ko‘ra, ularning ikkisi ham kamida 2023-yil 10-iyulgacha Apriori Trade MCHJ taʼsischilari hisoblangan. Hozirga kelib esa mazkur korxona ulushi Jaloliddinov Xusomiddin Xusniddin o‘g‘liga to‘liqligicha o‘tgan.
Tenderda ishtirokchilarni manfaatlar to‘qnashuvi mezoni bo‘yicha baholashda xarid komissiyasi ularning har ikkisiga 5 balldan 1 ball qo‘ygan. Lekin shunga qaramay, tender o‘tkazilgan deb topilgan.
Avvalroq Toshkent viloyati Ixtisoslashtirilgan somatika shifoxonasi tomonidan boshlang‘ich qiymati 500 million so‘mlik shubhali tender o‘tkazilib, ko‘p o‘tmay bekor qilingani haqida xabar berilgandi.
Izoh (0)