Farg‘ona viloyatidagi “Farg‘ona yo‘l qurish-ta’mirlash” unitar korxonasi tomonidan o‘tkazilgan tender ishtirokchisi boshlang‘ich qiymatiga nisbatan ming barobar kam narx taklifini berish orqali g‘olib bo‘ldi. Biroq shartnoma 672 million so‘m uchun tuzilgan. “Daryo” muxbiri xarid hujjatlarini o‘rganishi davomida bir qator shubhali ma’lumotlarga aniqlik kiritdi.
G‘olib MCHJ rahbarining bundan xabari bo‘lmagan
“Farg‘ona yo‘l qurish-ta’mirlash” unitar korxonasi 2024-yilning 18-25-dekabr kunlari korxonada ish olib borayotgan qurilish obyektlarida traller texnikasidan foydalanish ishlari bo‘yicha tender o‘tkazdi. Lotning boshlang‘ich qiymati 700 million so‘mni tashkil etgan.
Unda “Elegant davr dizayn” va “Farg‘ona yo‘l qurilish UFK” MCHJlar raqobatlashgan. Yakuniy natijalarga ko‘ra, boshlang‘ich qiymatga nisbatan ming barobar, ya’ni 600 ming so‘m narx taklif bergan “Farg‘ona yo‘l qurilish UFK” MCHJ g‘olib deb topilgan. 13-yanvar kuni shartnoma 672 million so‘m uchun imzolangan.
“Daryo” muxbiri suhbatlashgan MCHJ rahbari Nodirjon Karimovning aytishicha, tenderda 600 ming so‘m taklif qilinganidan xabari bo‘lmagan.
“Bundan xabarim yo‘q ekan. Hozir aniqlashtirsam, summani noto‘g‘ri kiritib qo‘yib, mendan yashirishgan ekan. Buyurtmachi bekor qilmayotgan ekan lotni. Shartnoma tuzilmagan deyishdi. Agar tuzilgan bo‘lsa ham bekor qilamiz. Bu summaga traller xizmatini ko‘rsatish mumkin emas. Xatoni to‘g‘rilaymiz”, deydi Nodirjon Karimov.
Buyurtmachi lotni bekor qilish niyatida emas
“Farg‘ona yo‘l qurish-ta’mirlash" unitar korxonasi bo‘lim boshlig‘i Soyibjon Abdurazzaqovning aytishicha, texnik xato tufayli taklif etilgan summa noto‘g‘ri yozilgan, lotni bekor qilishning esa imkoni bo‘lmagan.
“Texnik xato sababli lotga bildirilgan taklif 600 ming so‘m qilib noto‘g‘ri yozib qo‘yilgan. Bunga tasdiqlab bo‘linganidan so‘ng e’tibor beribmiz.
Tanlov yakunlanib bo‘lgandan keyin narxni ko‘rib, ular bilan gaplashganman. Bu juda past summa-ku, haqiqatan ham shunaqami, deb so‘raganman. Shundan so‘ng texnik xato bo‘lib qolganini aytib, bekor qilishimiz ni so‘rashdi.
Men esa ushbu xizmat 2025-yil davomida kerak bo‘lishini, qayta o‘tkazish uchun ikki oycha vaqt ketishini hisobga olib bekor qilolmasligimizni aytganman. Ancha turdi. Oxiri ularga nimadir zarur bo‘ldi chog‘i, o‘sha pulga shartnoma qilaveramiz, mayli deyishdi va yuborishdi. Hozir qarasam, shartnoma 672 million so‘mga tuzilgan ekan. Men 672 ming so‘m deb shartnomani rahbarning kalitidan (ERI kaliti nazarda tutilmoqda) imzolagandim. Summasiga e’tibor bermay qolgan ekanman. Bu mening xatoyim”, deydi Soyibjon Abdurazzoqov.
O‘tgan yilda o‘tkazilgan tenderlarning 60 foizida g‘olib MCHJ
E’tiborlisi va shubhalisi, korxona tomonidan 2024-yilda o‘tkazilgan 49 ta tenderning 28 tasida ushbu MCHJ g‘olib bo‘lgan. O‘tgan yilda firma tomonidan tender asosida 17 milliard so‘mga yaqin ishlar bajarilgan.
“Daryo” muxbiri holat yuzasidan korxona bo‘lim boshlig‘i — xarid komissiyasi a’zosi Soyibjon Abdurazzoqov bog‘landi. Uning aytishicha, ushbu korxona Farg‘ona viloyatidagi reytingi yuqori firmalardan biri hisoblanadi, shuningdek buyurtmachilarning talablariga javob beradi.
“Bu tashkilot yo‘l quradigan tashkilot hisoblanadi. Reytingda yuqori o‘rinlarda turadi, salohiyati baland. Tanlov mezonlarida biz qo‘ygan talablarga javob bergani uchun natija yaxshi chiqqan bo‘lishi mumkin. Keyin bizga doim ham pul tushmaydi. Hisobimizda pul turmaydi. Bitta ishni qiladigan yoki mahsulot sotadigan bo‘lsak ko‘proq nasiyaga bajartiramiz. Shuni ko‘pchilik bilgani uchun tender tanlovlarimizda qatnashmaydi.
Gohida bir-ikki oy, ba’zida esa olti-yetti oygacha hisobimizda pul bo‘lmay qolsa to‘lovlar cho‘zilib ketib qoladi. Shunga ko‘nadiganlar, mayli qilib beraveraman deganlar ko‘proq qatnashadi bizda.
Kimdir qatnashaman deb kelganda ham oldindan shu sharoitimizni tushuntiramiz. Shart qo‘ymaymiz-u, lekin agar to‘lovlar kechiksa bo‘g‘ilmasdan turasizlar deb ogohlantiramiz. Chunki pul bo‘lmay qolsa, sudlashib yurmasligimiz kerak.
Firma yo‘l qurilish bo‘yicha bizning Farg‘ona hududida ancha baquvvat tashkilot hisoblanadi. Ancha-muncha narsani yetkazib beroladi. Qo‘rqmasdan “shaffof”a ham kira oladi, qo‘rqmasdan mayda va katta tenderlarda ham qatnasholadi”, deydi Soyibjon Abdurazzoqov.
Tenderlarning yarmidan ko‘pi bir korxonaga berilishi raqobat muhitiga salbiy ta’sir ko‘rsatmaydimi?
Mas’ullardan ushbu tenderlar natijalariga e’tibor qaratib, shubhali holatlarni nazoratga olishni so‘raymiz.
Izoh (1)
Firma obröli e'tiborli baquvvat lekin ishchilar saviyasiz 672 ming söm bilan 672 000 000 sömni farqiga bormaydi. Firmani maxtayotganda ustasi farang ayyor ham deb qöshib qöyilar.