Farg‘ona viloyati “Yozyovon tumani yo‘llardan foydalanish” unitar korxonasi buyurtmachiligida o‘tkazilan tender natijalari bekor qilindi, deb xabar beradi Korrupsiyaga qarshi kurashish agentligi.
Qayd etilishicha, agentlik tomonidan o‘tkazilgan monitoring natijasida “Yozyovon tuman yo‘llardan foydalanish” unitar korxonasi buyurtmachiligida ichki xo‘jalik yo‘llarida amalga oshiriladigan joriy taʼmirlash ishlari uchun olinadigan TIB-B M-1 markali asfalt sotib olish maqsadida 2023-yil 10-aprel kuni o‘tkazilgan 3 milliard 494 million so‘mlik davlat xaridida bir qator qonunbuzilishlariga yo‘l qo‘yilgani aniqlangan.
Xususan, ushbu davlat xaridida “Davlat xaridlari to‘g‘risida”gi qonunning 10-moddasi (raqobat va xolislik prinsipi), 14-moddasi (manfaatlar to‘qnashuvi), 23-moddasi (xarid qilish tartib-taomillari ishtirokchisi) va 42-moddasi (ishtirokchini xarid qilish tartib-taomillarida ishtirok etishdan chetlatish shartlari) talablariga amal qilinmagan.
Yaʼni davlat xaridida ishtirok etgan bitta manzilda faoliyat yurituvchi 2 ta MCHJning rahbari va taʼsischisi bir kishi ekani yaqqol ko‘rinib turgan bo‘lsa-da, mavjud affillanganlik holatlariga baho berilmagan va nohalol raqobatni keltirib chiqargani o‘rganilmagan hamda holat bo‘yicha tanlovni o‘tkazishni vaqtinchalik bekor qilish choralari ko‘rilmagan.
Mazkur holatlar bo‘yicha xarid komissiyasining bayonnomasini bekor qilish to‘g‘risida agentlik tomonidan 10-aprel kuni buyurtmachiga taqdimnoma kiritilgan hamda qonuniy chora ko‘rish uchun to‘plangan hujjatlar Iqtisodiyot va moliya vazirligi huzuridagi Davlat moliyaviy nazorati inspeksiyasiga yuborilgan.
Agentlik taqdimnomasiga binoan Yozyovon tuman yo‘llardan foydalanish unitar korxonasi tomonidan 11-aprel kuni xarid komissiyasining bayonnomasi bekor qilingan.
Avvalroq Urganch shahar ixtisoslashtirilgan sanʼat maktab-internati buyurtmachiligida issiq ovqat bilan taʼminlash bo‘yicha o‘tkazilgan 731 million so‘mlik, Asaka tumanida esa tibbiyot birlashmasi o’tkazgan 620 million so’mlik tenderlar bekor qilingandi.
Izoh (0)