Saudiya Arabistonining “An-Nassr” klubi va Portugaliya terma jamoasi hujumchisi Krishtianu Ronaldu sevgilisi Jorjina Rodrigesga unashtiruv marosimi munosabati bilan 366 ming dollardan ortiq qiymatdagi sovg‘alar taqdim etdi. Bu haqda Daily Mail xabar berdi.
Hafta davomida eng ko‘p muhokama qilingan yangiliklardan biri — mashhur futbolchi va Jorjina Rodrigesning unashtirilgani bo‘ldi. To‘qqiz yildan ortiq vaqt birga bo‘lgan va besh nafar farzandni tarbiyalayotgan juftlik munosabatlarini rasman mustahkamlashga qaror qildi.
Rodriges Instagram’da barmog‘iga taqilgan yirik brilliant uzuk tasvirini joylab, izohda: “Ha, birga bo‘lishni istayman. Hozirgi hayotimda ham, keyingisida ham”, deb yozdi va suratda Ronalduni belgiladi.
OAV va blogerlar darhol uzukdagi yirik olmosni muhokama qila boshladi va uni “barcha ayollar orzusidagi taqinchoq” deb atadi. Ayrim manbalarga ko‘ra, olmos hajmi qariyb 35 karatni tashkil qiladi, qiymati esa 3 milliondan 5 million dollargacha baholanadi. Taqqoslash uchun, bu Jeff Bezosning rafiqasi Loren Sanchesning unashtiruv uzugidan besh karatga kattaroq.
Bir tomondan Ronalduning saxiyligi va uzoq yillik kutishdan so‘ng nihoyat taklif qilgani olqishlansa, ikkinchi tomondan internetda uzuk hajmiga oid kulgili memlar tarqaldi.
Ammo Jorjina uchun quvonchli lahzalar uzuk bilan cheklanib qolmadi. Futbolchi unga boshqa qimmatbaho sovg‘alar ham ulashdi. Ular orasida oq rangli Porsche Taycan elektromobili, Dior va Louis Vuitton kabi fransuz brendlaridan kiyim-kechak va sumkalar, shuningdek, hashamatli kosmetika, atir va soatlar bor.
Foto: Daily Mail
Ronalduning aytishicha, u Jorjinani ilk bor 2016-yilda Gucci do‘konida uchratgan. Ayol u paytda sotuvchi-konsultant bo‘lib ishlagan. “Bu bir qarashdayoq sevgi edi”, deya eslaydi juftlik. Jorjina esa dastlab mashhur futbolchining yonida o‘zini juda tortinchoq sezganini intervyularida ko‘p marta aytib o‘tgan.
2017-yilda ularning ilk farzandi — qizi Alana Martina dunyoga keldi. 2022-yilda ular egizak kuta boshladi, qiz farzand sog‘-salomat tug‘ildi, biroq o‘g‘il farzand hayotdan ko‘z yumdi. Shuningdek, juftlikning surrogat onalardan tug‘ilgan uch nafar farzandi ham bor.
Ronaldu va Jorjina to‘y sanasi va unashtiruv tafsilotlari hozircha e’lon qilinmagan.
Izoh (0)