Фаолият кўрсатмаётган ғолиб, яқин қариндошлар ва қўшнилар баҳси — ўтган ҳафтада ўтказилган тендерларга назар

Шу йилнинг 17—23 февраль кунлари Ўзбекистон Республикаси товар-хом ашё биржасида мингдан ортиқ тендерлар амалга оширилди. “Дарё” мухбири Умиджон Мамарасулов ҳужжатларни мониторинг қилиб, эътиборга молик савдолар ҳақида маълумот беради.

Маҳалладошлар баҳси

Тошкент шаҳар ҳокимлигининг Маърифат маркази биносидан фойдаланиш ва бинога туташ ҳудудга хизмат бўйича ихтисослаштирилган дирексияси бошланғич қиймати 119 миллион 340 минг сўмлик тендер ўтказган. Унда “SS-Clean”, “Мир Шох Сам Ду” ва “Clean-Wаy” МЧЖлар ғолиблик учун курашган. Якунда “Мир Шох Сам Ду” корхонаси 119 миллион 142 минг сўм билан тендерни ютиб олган.

Ғолиб 30 кун давомида “Маърифат маркази” биносининг фасади, ойналари, витринаси, алюминий профилини алпинистлар ёрдамида махсус кимёвий воситалар билан тозалаши зарур.

Эътиборлиси, икки иштирокчи “Мир Шох Сам Ду” ва “Clean-Wаy” МЧЖлар Бекобод туманининг Хос шаҳарчаси О.Тожибоев кўчасида жойлашган. 

Рақобатчилар қариндош?!

“Навоий вилояти ҳудудий яшил ҳудуд” унитар корхонаси “Яшил ҳудуд” ДУК 6—18 февраль кунлари Зарафшон шаҳрида “Менинг боғим” лойиҳаси асосида “Яшил боғ” барпо этиш ишлари бўйича учта тендер ўтказди. Бошланғич қиймати 30,9 миллион сўм бўлган. Энг яхши таклифни танлашда иккита — “Римит-Пласт” хусусий корхонаси ва “Электронур” масъулияти чекланган жамияти қатнашган.

Иштирокчи корхоналарнинг маълумотларини кўздан кечириш давомида уларнинг таъсисчилари эътиборимизни тортди. “Римит-Пласт” Навоий шаҳрида жойлашган бўлиб, таъсисчиси Рустамов Бахриддин Тоғаймуродович ҳисобланади. Самарқанд вилоятининг Пахтачи туманидан рўйхатдан ўтган “Электронур” масъулияти чекланган жамиятининг 81 фоиз улуши эса Рустамов Нуриддин Тоғаймуродович ва Рустамов Учқун Тагаймуродовичга тегишли. Корхоналар бошқа-бошқа ҳудудларда жойлашса-да, таъсисчилар ўртасида қариндошлик алоқалари бўлиши мумкин. 

Ғолиб ва захира ғолибнинг манзили бир 

“Ўзбекгеофизика” акциядорлик жамияти корхонанинг 430 та автотранспорт воситаси координаталарини кузатиб бориш хизматларини кўрсатиш бўйича 231,6 миллион сўмлик тендер ўтказган. Унда “Fleet Management Solutions”, “UZGPS” МЧЖлар ва “Дуопро” хусусий корхонаси рақобатлашиб, якунда биринчи тадбиркорлик субъекти 203 миллион 820 минг сўм билан тендерни ютиб олган.

Тендер ғолиби бўлган “Fleet Management Solutions” МЧЖ Тошкент шаҳри, Мирзо Улуғбек тумани, “Асака” МФЙ, Мустақиллик шоҳкўчаси 88-уйда жойлашган.

Балки тасодифдир, аммо захира ғолиби ҳисобланган “Дуопро” МЧЖ ҳам айнан шу манзилда жойлашган. 

Яна бир эътиборли жиҳати, ғолиб – маълумотларни жойлаштириш ва ишлов бериш бўйича хизматлар, захира ғолиби эса – электрон ва телекоммуникацион ускуналар ва уларнинг эҳтиёт қисмлари улгуржи савдоси билан шуғулланади. 

Бундан келиб чиқяптики, ушбу иккала фирма ўзаро алоқадор ва тендерларда келишув асосида иштирок этаётган бўлиши мумкин. Бу эса қонун бузилиш ҳолати мавжудлигидан далолат беради.

Ишламаётган корхона ғалаба қозонди

Ўтган ҳафтада Аму-Сурхон ирригация тизимлари ҳавза бошқармаси ҳузуридаги Насос станциялари ва энергетика бошқармаси томонидан электродвигателларни мукаммал таъмирлаш ишлари бўйича иккита танлов ўтказди. Бирининг бошланғич қиймати 170 миллион, иккинчисиники эса 350 миллион сўмни ташкил этади.

Иккала танловда ҳам “Матор Тамир” МЧЖ ҳамда “Верфокус” МЧЖлар қатнашган. Биринчи танловда энг паст нарх — 349,9 млн сўм таклиф қилган “Верфокус” МЧЖ, иккинчисида эса — 169,9 млн сўм таклиф қилган “Матор Тамир” МЧЖ ғолиб деб топилган. 

Статистика агентлиги маълумотига кўра, “Матор Тамир” МЧЖ Фарғона вилояти, Бувайда тумани, “Таррачи” МФЙ, Гулдиёр кўчаси 866-уйда жойлашган. Шунингдек, маълумотда ушбу корхона фаолият кўрсатмаётганлиги қайд этилган. 

Эътиборлиси, “Матор Тамир” МЧЖ 5-12 февраль кунлари ўтказилган тендерда ҳам қатнашиб, бошланғич нархдан 100 минг сўм фарқ билан ғолиб бўлган.

“Дарё” масъуллардан ушбу шубҳали тендерлар натижаларига эътибор қаратишни сўрайди ва ўтказилаётган давлат харидларини кузатишда давом этади.