Toshkent viloyati Ixtisoslashtirilgan somatika shifoxonasi tomonidan 15–22-may kunlari boshlang‘ich qiymati 500 million so‘mlik shubhali tender o‘tkazilgani, unda ota o‘g‘liga xaridni yutishda yordam bergan bo‘lishi haqida xabar qilingandi. Korrupsiyaga qarshi kurashish agentligi holatga munosabat bildirdi.
Tasdiqlanishicha, shifoxona buyurtmachiligida 23-may kuni o‘tkazilgan 500 million so‘mlik davlat xaridida talabgor va g‘olib deb topilgan A.a.E.S. MChJ rahbari (E.B.O.)ning otasi (U.O.E.) ushbu shifoxonada xo‘jalik mudiri va xarid komissiyasining aʼzosi bo‘lgan.
Ammo mazkur holat xarid komissiyasi tomonidan eʼtiborga olinmay, nohalol raqobat kelib chiqqani o‘rganilmagan hamda holat bo‘yicha tanlovni o‘tkazishni vaqtinchalik bekor qilish choralari ko‘rilmagan.
Oqibatda “Davlat xaridlari to‘g‘risida”gi qonunning:
- 10-moddasi (raqobat va xolislik prinsipi);
- 14-moddasi (manfaatlar to‘qnashuvi);
- 19-moddasi (davlat buyurtmachilari);
- 42-moddasi (ishtirokchini xarid qilish tartib-taomillarida ishtirok etishdan chetlatish shartlari);
- hamda “Raqobat to‘g‘risida”gi qonunning talablari buzilishiga va boshqa qonunbuzilish holatlariga yo‘l qo‘yilgan.
Bundan tashqari, “Davlat xaridlari to‘g‘risida”gi qonunning 46-moddasiga zid ravishda xaridda ishtirok etgan 2 nafar tadbirkorning hujjatlari ushbu shifoxona xodimi tomonidan buyurtmachining xarid komissiya raisi, kotibi, aʼzolari ishtirok etgan va foydalangan kompyuter IP-manzili orqali elektron platformaga yuklangani maʼlum bo‘lgan.
Mazkur holatlar bo‘yicha Korrupsiyaga qarshi kurashish agentligi tomonidan 25-may kuni xarid komissiyasi bayonnomasini bekor qilish to‘g‘risida buyurtmachiga taqdimnoma kiritilgan.
Shuningdek, qonuniy chora ko‘rish uchun to‘plangan hujjatlar Bosh prokuratura huzuridagi Iqtisodiy jinoyatlarga qarshi kurashish departamentiga yuborilgan. Holat bo‘yicha xizmat tekshiruvi o‘tkazish uchun Sog‘liqni saqlash vazirligiga so‘rovnoma kiritilgan.
Izoh (0)