Transport vazirligi Toshkent—Andijon pulli avtomobil yo‘lini davlat-xususiy sheriklik asosida loyihalashtirish, qurish, moliyalashtirish, boshqarish va texnik xizmat ko‘rsatish loyihasi birinchi bosqichi bo‘yicha tender o‘tkazilishini e’lon qildi.
Qayd etilishicha, tender Iqtisodiyot va moliya vazirligi hamda Avtomobil yo‘llari qo‘mitasi ishtirokida tashkillashtiriladi. Jahon banki ko‘magida Arup and Partner’s (Buyuk Britaniya), PWC (O‘zbekiston) va CMS Cameron (Buyuk Britaniya) konsultantlar konsorsiumi hukumat tomonidan xususiy sherikni tanlashga yordam berish uchun loyihaning maslahatchisi sifatida jalb qilingan.
Loyihaning 1-bosqichi umumiy uzunligi 171 kilometrni tashkil etib, Toshkentdan Angrengacha bo‘lgan avtomobil yo‘li va Qamchiq dovonini loyihalashtirish, qurish, moliyalashtirish, boshqarish va texnik xizmat ko‘rsatishni o‘z ichiga oladi. Loyiha konsepsiyasi Vazirlar Mahkamasi tomonidan 2025-yil 21-yanvarda tasdiqlandi.
Tender ikki bosqichda o‘tkaziladi. Birinchi bosqichda xususiy kompaniyalar dastlabki malakalashdan o‘tish uchun hujjatlarini topshiradi. Ikkinchi bosqichda dastlabki saralashdan o‘tgan kompaniyalar loyiha bo‘yicha texnik va moliyaviy takliflarini taqdim etadi. Tenderda g‘olib bo‘lgan ishtirokchi bilan uzoq muddatli DXSh bitimi imzolanadi.
Avtomobil yo‘llari qo‘mitasi yo‘l qurilish sohasida DXSh loyihalarida tajribaga ega bo‘lgan barcha qiziquvchilarni 2025-yil 21-aprel kuni, Toshkent vaqti bilan soat 18:00 ga qadar dastlabki malakani saralash bosqichi uchun hujjatlarini topshirishga taklif etdi. Ariza topshirish bo‘yicha ko‘rsatmalar va malaka talablari haqida batafsil maʼlumot olish uchun dastlabki malaka so‘rov (RFQ) hujjatiga murojaat qilish lozim.
Loyiha maʼlumotlar bazasiga kirish, dastlabki malaka hujjatlarini topshirish hamda loyiha va RFQ bo‘yicha har qanday aniqlik kiritish uchun quyidagi pochtalar orqali “Avtomobil yo‘llari qo‘mitasi” va Arup and Partner’s (Buyuk Britaniya), PWC (O‘zbekiston) va CMS Cameron (Buyuk Britaniya) konsultantlar konsorsiumi bilan bog‘lanish lozim:
Toshkent—Andijon pulli yo‘li
O‘zbekistondagi ilk pulli yo‘llarning qurilishi haqida 2018-yilda xabar berilgandi. O‘shanda bu kabi yo‘llarning birinchisini qurish bilan Germaniya kompaniyasi shug‘ullanishi mumkinligi aytilgandi. 2019-yilda O‘zbekistondagi ilk pulli trassani qurish uchun joy tanlandi.
2022-yil oktyabrda Toshkent—Andijon va Toshkent—Samarqand pulli avtomobil yo‘llari 2026-yilgacha qurib bitkazilishi aytildi. Avgust oyida transport vaziri o‘rinbosari Ilhom Abdugafarov Jahon banki hamda Yevropa tiklanish va taraqqiyot banki loyiha koordinatorlari pulli yo‘llarni qurish bo‘yicha qonun loyihasini ishlab chiqish masalasini muhokama qilgandi.
Toshkent—Andijon pulli yo‘li Toshkent va boshqa hududlarni Farg‘ona vodiysi bilan bog‘lashga yordam beradi. Loyihaning umumiy uzunligi 314 kilometr bo‘lib, uning qiymati 4,65 milliard dollarni tashkil qiladi.
Izoh (0)