Prezident Shavkat Mirziyoyevga 3-fevral kuni Toshkent—Andijon muqobil yo‘li loyihasi bo‘yicha hisobot berilgan edi. Transport vaziri Ilhom Mahkamov ushbu loyihalar xususida intervyu berdi.
Vazirning aytishicha, Toshkent—Andijon yo‘li qurilishi loyihasi 10,5 mln nafardan ortiq aholi yashaydigan vodiy ahlini poytaxt va voha bilan “arteriya” bo‘ladi.
“Yanvar oyida ushbu loyiha bo‘yicha tender eʼlon qilindi. Bunda ikki bosqichdan iborat bo‘lgan tender amalga oshiriladi. Joriy yilda qurilish ishlarini boshlaymiz. 30 dan ortiq dunyoda taniqli kompaniyalar qiziqish bildirdi. O‘ylaymizki, tender orqali salohiyatli kompaniyalar tanlanadi”, deydi Mahkamov.
Transport vaziri Toshkent—Samarqand 300 km dan iborat, olti tasmali yo‘l qurilishi loyihasi bo‘yicha ham loyihaviy hujjatlar ishlari yakunlanganini aytdi.
“Hozirgi kunda tender ishlarini amalga oshiryapmiz. Bu loyiha bo‘yicha ham ishlar joriy yilda boshlanishi ko‘zda tutilgan. Prezidentimiz tomonidan barcha tender jarayonlarini qoidalarga to‘laqonli rioya qilgan holda, lekin ortiqcha vaqt sarflamasdan, joriy yilda ikkala yo‘l qurilish ishlarini boshlash topshirildi”, deya qo‘shimcha qilgan Ilhom Mahkamov.
Toshkent—Andijon pulli yo‘li
O‘zbekistondagi ilk pulli yo‘llarning qurilishi haqida 2018-yilda xabar berilgandi. O‘shanda bu kabi yo‘llarning birinchisini qurish bilan Germaniya kompaniyasi shug‘ullanishi mumkinligi aytilgandi. 2019-yilda O‘zbekistondagi ilk pulli trassani qurish uchun joy tanlandi.
2022-yil oktyabrda Toshkent—Andijon va Toshkent—Samarqand pulli avtomobil yo‘llari 2026-yilgacha qurib bitkazilishi aytildi. Avgust oyida transport vaziri o‘rinbosari Ilhom Abdugafarov Jahon banki hamda Yevropa tiklanish va taraqqiyot banki loyiha koordinatorlari pulli yo‘llarni qurish bo‘yicha qonun loyihasini ishlab chiqish masalasini muhokama qilgandi.
Toshkent—Andijon pulli yo‘li Toshkent va boshqa hududlarni Farg‘ona vodiysi bilan bog‘lashga yordam beradi. Loyihaning umumiy uzunligi 314 kilometr bo‘lib, uning qiymati 4,65 milliard dollarni tashkil qiladi.
Izoh (1)
Oxirgi bekatga yetib kelibdi.