Milliardlar sarflangan sayt va platformalar nega ishlamayapti?

2024-yilda vazirlik va idoralar tomonidan veb-sayt va mobil ilova ishlab chiqish bo‘yicha o‘ndan ortiq tender o‘tkazilgan hamda to‘g‘ridan-to‘g‘ri shartnomalar tuzilgan. Milliardlab mablag‘lar sarflangan sayt va portallarning ayrimlari ishga tushmagan yoki umuman ishlamayapti.

“Daryo” ushbu veb-sayt va portallarning keyingi taqdiri bilan qiziqib, faoliyatini tahlil qildi.

Tender bekor qilingan, biroq platformani shu yil ishga tushirishmoqchi

O‘tgan yilning iyul oyida Respublika ma’naviyat va ma’rifat markazi “Qadriyatim.uz”, “Tanlov.manaviyat.uz” sayti va mobil ilovasini yaratish xizmati uchun 1,3 milliard so‘m (102 ming dollar)lik tender o‘tkazgan edi. O‘shanda tender muhokamalarga sabab bo‘lgandi.

Markaz sayt hamda mobil ilova yaratilishi haqidagi xabarga munosabat bildirib, tanlovlarni o‘tkazishda ochiqlik va shaffoflik, raqobat va xolislik, korrupsiyaga yo‘l qo‘ymaslik prinsiplariga amal qilinganini ma’lum qilgandi.

Raqobatni rivojlantirish va iste’molchilar huquqlarini himoya qilish qo‘mitasi tomonidan tanlov savdolari bo‘yicha o‘rganish ishlari amalga oshirilganini, natijalar bo‘yicha “Raqobat to‘g‘risida”gi qonunning 29-moddasi talablariga rioya qilinmagani alomatlari yuzasidan nisbatan ish qo‘zg‘atilgani hamda belgilangan tartibda ko‘rib chiqilishini bildirgandi. Biroq yakuniy xulosalar ommaga oshkora qilinmagan.

“Daryo” muxbiri bog‘langan tender g‘olibi United IT Company MCHJ mas’ullarining aytishicha, tender natijalari o‘sha paytda Raqobat qo‘mitasi tomonidan bekor qilingan.

Ammo Ma’naviyat va ma’rifat markazi matbuot kotibi Barno Ahmedovaning aytishicha, “Qadriyatim.uz” platformasi, mobil ilovasini ishlab chiqish va ishga tushirish haqidagi e’lonni joriy yilning 3-choragida ochiq tanlov portaliga joylash rejalashtirilgan. Shartnoma bekor qilingan bo‘lsa, portal qaysi mablag‘ hisobidan yaratilayotgani haqidagi savol ochiq qoldi.

Shov-shuvli portaldan hamon darak yo‘q

2023-yilning oktyabr oyida madaniyat vaziri Ozodbek Nazarbekov 10 nafar san’atkor haqida ma’lumot beruvchi portalni yaratish va amaliyotga tatbiq etish uchun salkam yarim milliard so‘m mablag‘ sarflayotgani haqida xabarlar tarqalgandi.

Davlat mukofotlari bilan taqdirlangan madaniyat va san’at sohasi vakillari haqida ma’lumotlar jamlanishi belgilangan portal oradan bir yarim yildan ortiq vaqt o‘tsa-da, haligacha ishga tushgani yo‘q.

Vazirlik mas’ullarining ma’lum qilishicha, o‘shanda saytni ishlab chiqarish bo‘yicha belgilangan muddat uzaytirilgan. Keyinchalik esa Madaniyat vazirligi yagona boshqaruv tizimiga integratsiya qilish orqali “Ijodkorlar.uz” saytini ishlab chiqish va buning uchun ajratilishi belgilangan mablag‘ni tejab qolish rejalashtirilgan. Ishlab chiqish bo‘yicha choralar ko‘rilmoqda.

Sayt — mavjud. Ammo unga hech qanday ma’lumot joylanmagan. Unga sarflanishi ko‘zda tutilgan yarim milliard so‘m “tejab qolingani” haqidagi ma’lumot esa mavjud emas.

Madaniyat vazirligi yana bir resurs — “O‘zbek madaniyati” portalini ishlab chiqish uchun salkam 600 million so‘mlik to‘g‘ridan-to‘g‘ri shartnoma imzolagan. Shartnoma 2024-yilning oktyabr oyida imzolangan. Kelishuvga ko‘ra, u 48 ish kunida ishlab chiqilishi lozim edi, ammo hozircha portaldan darak yo‘q.

Vazirlik matbuot kotibi Sirojiddin O‘sarov portal ishlab chiqilganini hamda test rejimida ishga tushirilgani va aprel oyidan to‘liq faoliyat boshlashini bildirdi.

1 milliard so‘mlik portal hali bitmagan

Oktyabr oyida Fanlar akademiyasi “Fan-portal” (my.academy.uz) yagona axborot tizimini ishlab chiqish va joriy etish bo‘yicha tender o‘tkazgan. Lotning boshlang‘ich narxi 1 milliard so‘m etib belgilangan. Tenderda uch nafar ishtirokchi qatnashgan.

Yakuniy xulosalarga ko‘ra, 802 million so‘m taklif qilgan “Unicon.uz-fan-texnika va marketing tadqiqotlari markazi” MCHJ g‘olib deb topilib, shartnoma imzolangan. Shartnomaga ko‘ra, g‘olib 90 kun davomida ishlarni bajarishi va topshirishi belgilangan.

Fanlar akademiyasi mas’ullari tomonidan ayni paytda jarayonlar davom etayotgani, oxirgi ishlar amalga oshirilayotganini, tez kunda portal ishga tushishini bildirdi. Biroq qachon ishga tushishi bo‘yicha aniq ma’lumot berilmadi.

Shuningdek, Fanlar akademiyasining Tarix instituti aprel oyida “Toshkent shahar Arxeologik yodgorliklar sonini aniqlash va xaritalash” loyihasi bo‘yicha 100 million so‘mlik tender o‘tkazgan. Xarid komissiyasining yakuniy xulosasiga ko‘ra, 90 million so‘mlik shartnoma imzolangan.

Institut direktor o‘rinbosari Dilnoza Jamalovaning ma’lum qilishicha, “Qadimiytoshkent.uz” veb-sayti ishlab chiqilib, ishga tushirilgan. Ammo uning to‘laqonli faoliyat ko‘rsatmayotgani, saytdagi ruknlar chala holda qoldirilganiga o‘zingiz guvoh bo‘lishingiz mumkin.

Qonun loyihalari qachon raqamlashadi?

Adliya organlarida Axborot-kommunikatsiya texnologiyalarini rivojlantirish markazi iyul oyida “O‘zbekiston Respublikasi Oliy Majlisi Qonunchilik palatasi va Oliy Majlisi Senatida qonun loyihalarini ko‘rib chiqishning barcha bosqichlarini raqamlashtirish” axborot-tahliliy tizimini ishlab chiqish bo‘yicha tender o‘tkazgan. Boshlang‘ich narxi 1,5 milliard so‘m bo‘lgan loyihani 750 million so‘m taklif bilan “Simplex” MCHJ yutib olgan.

O‘rganishlar davomida tizim ishga tushgan yoki tushmaganini aniqlashning imkoni bo‘lmadi.

Simplex rahbari Nuriddin Rashidovning aytishicha, tizim ishlatish uchun tayyor, texnik ishlar o‘tgan yilning dekabr oyida yakunlanib, buyurtmachiga topshirilgan.

Vazirlikdan esa ushbu tender yuzasidan ma’lumot olishning imkoni bo‘lmadi. “Daryo” bog‘langan mas’ullardan biri “yaxshi, aniqlashtiramiz” degach, savollarga qayta javob bermadi.

1,2 milliard sarflangan saytlar qani?

Oliy ta’lim, fan va innovatsiyalar vazirligi huzuridagi Innovatsion rivojlantirish agentligi 2023-yilning aprel oyida Yagona startaplar platformasi veb-saytini ishlab chiqish bo‘yicha tender o‘tkazgan edi. Tender yakunlari bo‘yicha 705 million so‘mlik shartnoma imzolangan. Mablag‘ning yarim qismi o‘tkazilmaganligi bois 2024-yilda to‘g‘ridan-to‘g‘ri qo‘shimcha kelishuv imzolangan.

O‘rganish davomida “Inplatform.uz” domeniga kirishning ham, holat yuzasidan agentlik matbuot xizmati bilan bog‘lanishning ham iloji bo‘lmadi.

Shu bilan birga, 520 million so‘m mablag‘ sarflanib, ishlab chiqilgan Oliy ta’lim muassasalarining ilmiy ishlari va innovatsiyalari natijalarini baholash platformasi ham ishlamayotganligi aniqlandi.

Uzinfocom ma’lumotlariga ko‘ra, iftib.uz domeni mavjud emas. “Inplatform.uz” sayti uchun sotib olingan domen muddati tugagan.

Jami 1,2 milliard so‘m sarflangan platformalarning ishlamayotgani esa achinarli.

Xulosa

Hozircha veb-sayt va portallar bo‘yicha imzolangan shartnomalarning ayrimlarini tahlil qildik xolos. Ammo kichik o‘rganish ham milliardlar sarflanayotgan resurslar ulardan kutilgan natijalarni bermayotganini ko‘rsatmoqda.

Biz bu boradagi o‘rganishlarni davom ettiramiz. Mavzuga yana qaytamiz.