Janubiy Koreyada jinoyatchilik darajasini pasaytirish maqsadida tabiiy o‘lchamdagi golografik politsiyachi paydo bo‘ldi. Bu hada Oddity Central xabar berdi.
Ma’lum qilinishicha, Seuldagi Jyudong bog‘ida har kuni tabiiy o‘lchamdagi golografik politsiyachi paydo bo‘lib, o‘tkinchilarga kuzatuv kameralari mavjudligi va huquq-tartibot xodimlari favqulodda vaziyatlarda darhol harakat qilishga shay ekanini eslatib turadi.
O‘tgan yilning oktyabr oyida tajriba tariqasida o‘rnatilgan model allaqachon sezilarli natija bergan. Politsiya ma’lumotlariga ko‘ra, park hududidagi jinoyatlar soni taxminan 22 foizga kamaygan. Jungbu politsiya bo‘limi boshlig‘i An Don Hyonning ta’kidlashicha, bu texnologiya fuqarolarda xavfsizlik hissini oshiradi va jinoyatlarning oldini olishda samarali ta’sir ko‘rsatadi.
“Biz istirohat bog‘larida odamlar o‘zlarini xavfsiz his qiladigan muhit yaratish uchun sun’iy intellektdan foydalangan holda bunday tashabbuslarni kengaytiramiz”, deydi politsiya zobiti.
Gologramma jinoyatchilarni qo‘lga olishga qodir bo‘lmasa-da, politsiya uni samarali tiyib turish vositasi deb hisoblaydi.
Shunga qaramay, aholi orasida bu yangilik turlicha munosabatlarni keltirib chiqardi. Ijtimoiy tarmoqlarda gologrammani “zamonaviy qo‘riqchi” bilan taqqoslashdi va odamlar “arvoh politsiyachi” bilan uchrashgandan so‘ng parkka kirishni to‘xtatgani uchun jinoyatlar kamaygani haqida hazillashishdi.
Izoh (0)