“Daryo” internet nashrida Dehqonobod tuman hokimligi tender o‘tkazilgani, unda hokimlikka tegishli bozor g‘olib chiqqani haqida material e’lon qilingan edi. Holat yuzasidan tuman hokimligi munosabat bildirdi.
Hokimlikning ma’lum qilishicha, Vazirlar Mahkamasining 2024-yil 30-oktyabrdagi “2024—2025-yillar qish-bahor mavsumida aholining va ijtimoiy soha tashkilotlarining asosiy turdagi qishloq xo‘jaligi mahsulotlariga bo‘lgan ehtiyojini qondirish bo‘yicha qo‘shimcha chora-tadbirlar to‘g‘risidagi” 716-sonli qarori ijrosini ta’minlash maqsadida Xalq deputatlari Dehqonobod tuman kengashining 2024-yil 4-dekabrdagi VII-3-015-4-57-K/24-sonli qarori qabul qilingan.
Qarorga asosan mahalliy byudjet mablag‘lari hisobidan tuman ichki bozorida narxlarni barqarorligini saqlash va aholining asosiy turdagi oziq-ovqat mahsulotlari zaxirasini yaratilishini tashkil etish maqsadida uzoq muddat saqlanadigan zaxira uchun qishloq xo‘jaligi mahsuloti (kartoshka) sotib olish belgilangan. Shunga ko‘ra, “Davlat xaridlari to‘g‘risida”gi O‘RQ-684-sonli qonunining 7-bobi eng yaxshi takliflarni tanlash 56-moddasi talablariga asosan ochiq elektron tanlov o‘tkazilgan.
“Vazirlar Mahkamasining 716-sonli qaroriga asosan buyurtmachi Dehqonobod tuman hokimligi tomonidan ochiq elektron tanlov o‘tkazishda texnik shartlar qo‘yilgan bo‘lib, mahsulot yetkazib beruvchi texnik shartlarga to‘liq javob berishi kerak bo‘lgan.
Komissiya a’zolari tomonidan o‘rganilganda qo‘yilgan texnik talablar va shartlar bo‘yicha Dehqonobod “Dehqon oziq-ovqat bozori” MCHJ tomonidan kiritilgan ma’lumotlar batafsil yoritilganligi sababli nisbatan yuqori baholangan.
Iqtisodiyot va Moliya vazirligi huzuridagi G‘aznachilik xizmati qo‘mitasining 2024-yil 18-noyabrdagi 01/09-35/277-sonli xatiga ko‘ra 2024-yil 24-dekabr kuni to‘g‘ridan to‘g‘ri tuziladigan shartnomalar natijalarini joylashtirishning 2024-yildagi so‘nggi kunlari sifatida belgilangan, tender 2024-yil 24-dekabrda yakunlangan bo‘lib, qonun talablariga ko‘ra o‘tkazilgan tender natijalari tender ishtirokchilari o‘rtasida 2 kunlik muhokama jarayonida bo‘ldi. Muhokama jarayoni tugaganda joriy sana 2024-yil 26-dekabrga to‘g‘ri kelganligi sabali ushbu tender natijasi bo‘yicha shartnoma Dehqonobod tuman g‘aznachilik bo‘linmasida ro‘yxatdan o‘tkazilmagan.
Ya’ni aytadigan bo‘lsak, bu tender natijalariga ko‘ra tanlovda g‘olib bo‘lgan Dehqonobod “Dehqon oziq-ovqat bozori” MCHJ bilan shartnoma belgilangan muddatda Dehqonobod tuman g‘aznachilik bo‘linmasi tomonidan ro‘yxatdan o‘tkazilmaganligi sababli tender natijalari bekor qilingan hamda tez orada qayta tender e’lon qilinishi ko‘zda tutilgan.
- Ma’lumot o‘rnida, “Etender.uzex.uz” tizimida e’lon qilinadigan ochiq tanlovlarda Respublikamizning istalgan nuqtasida turib, ishtirok etish huquqiga ega bo‘lgan har qanday tadbirkorlar qatnashishlari mumkin.
- Shundan ham xulosa qilish mumkinki, mazkur ochiq tanlovda hech qanday manfaatlar to‘qnashuvi yuzaga kelmagan”, deyiladi munosabatda.
Izoh (0)