Toshkent viloyatida joylashgan “Maxam-Chirchiq” AJ 2022-2024-yillarda o‘tkazilgan 3 ta tenderda “Yakka tartibdagi tadbirkor” g‘olib bo‘lgan. Qolgan oltita tanlovda zaxira g‘olibi sifatida ko‘rsatilgan. Qizig‘i, tanlovlarda g‘alaba qozonayotgan bu tadbirkorning kimligi mutlaqo noma’lum. Chunki tender hujjatlarida g‘olib haqida hech qanday ma’lumotlar mavjud emas.
“Daryo” muxbiri “Maxam-Chirchiq” o‘tkazgan tenderlar ma’lumotlarini ko‘zdan kechirish jarayonida bir qator shubhali holatlarga duch keldi.
Gap shundaki, jamiyat 2024-yilning 26-dekabridan 2025-yilning 7-yanvariga qadar ekskavator bilan ta’minlash xizmati bo‘yicha 468 million so‘mdan ortiq boshlang‘ich narx taklif qilingan tender o‘tkazgan. Tenderda bir nafar fuqaro va “Yakka tartibdagi tadbirkor” raqobatlashgan va unda fuqaro Namozov Qodir Ashurovich 466 million 567 ming so‘m taklif qilib, g‘olib chiqqan. “Sirli” yakka tartibdagi tadbirkor esa zaxira g‘olibi sifatida ko‘rsatilgan.
Ushbu tadbirkor 2022-2024-yillarda “Maxam-Chirchiq” o‘tkazgan jami 9 ta tenderda qatnashgan. Xarid komissiyasining xulosalariga ko‘ra, u uchta lot bo‘yicha g‘olib deb topilgan. Qolgan 6 ta holatda esa zaxira g‘olibi sifatida keltirilgan. Ammo yuqorida ta’kidlanganidek, bu tenderlarning birortasida u o‘zi haqidagi ma’lumotlarni keltirmagan.
Bu — qonunchilikka zid. “Davlat xaridlari to‘g‘risida”gi qonunning 69-moddasiga muvofiq, Takliflarni ko‘rib chiqish va baholash bayonnomasida takliflari ko‘rib chiqilgan tender ishtirokchilari to‘g‘risida ma’lumotnoma va g‘olibning nomi yoki familiyasi, ismi, otasining ismi hamda pochta manzili bo‘lishi shart.
Qiziq jihati “Yakka tartibdagi tadbirkor” faqatgina bir nafar ishtirokchi ariza topshirgan tenderlarda qatnashgan. Shuningdek, ishtirokchilarning takliflari ma’qul kelmagan tenderlarda ham o‘z takliflarini bergan.
Bundan ko‘rinib turibdiki, “Maxam-Chirchiq” qonun talablarini aylanib o‘tish orqali qonunbuzilishlarga yo‘l qo‘ygan bo‘lishi mumkin.
Ikki yildan buyon ushbu holatlarga davlat xaridlari sohasi ustidan nazorat qiluvchi vakolatli organlarining e’tibor qaratmaganligi esa yanada ajablanarli.
Benefitsiari aniq bo‘lmagan ishtirokchilar taklif berishi mumkinmi?
Nega ikki yildan beri jamiyat xarid komissiyasi qonun talablarini buzib kelmoqda?
Ma’lumot uchun, “Maxam-Chirchiq” AJ 1991-yilda davlat ro‘yxatidan o‘tkazilgan bo‘lib, ulushining 51 foizi “O‘zkimyosanoat” aksiyadorlik jamiyatiga, qolgan 49 foizi esa “Maxamcorp International S.L.” korxonasiga tegishli. Ya’ni korxona davlat ulushi mavjud tashkilotlardan biri hisoblanadi.
“Daryo” mas’ullardan shu savollarga javob kutadi.
Izoh (0)