“Garri Potter” yulduzi oilaning yagona farzandi. Uning ota-onasi Alan va Marsiya ham yoshliklarida aktyorlik sohasida o‘zlarini sinab ko‘rgan. Biroq sezilarli muvaffaqiyatga erisha olishmagach, otasi adabiy agent, onasi esa kasting direktori sifatida ishlaydi.
Deniel ham yoshligidanoq aktyorlikni orzu qilardi. “Men 5 yoshda edim. Onamga qarab: “Oyi, men aktyor bo‘lmoqchiman, deganman, deydi Redkliff.
Bo‘lajak yulduzning ota-onasi yagona farzandlarining bunday tanlovidan mamnun emasdi. Ikkalasi ham shou-biznes va kino olamida unchalik ijobiy tajribaga ega bo‘lmaganlari uchun, tabiiyki, Denielning xuddi shu yo‘ldan borib, o‘sha qiyinchiliklarga duch kelishini istamasdilar.
Ammo Deniel ulg‘aygach, unga kastingda qatnashishga ruxsat berishdi. Bunda ular muvaffaqiyatdan ko‘ra, o‘g‘illari haqiqiy kino jarayoni va aktyorlik kasbining barcha salbiy tomonlariga duch kelgach, ishtiyoqi so‘nishiga umid qilishgandi.
Ammo tajriba juda muvaffaqiyatli bo‘ladi. Deniel 10 yoshida BBC One telekanalining ikki qismli “Devid Kopperfild” filmida ekrandagi ilk qadamini qo‘ydi. Keyingi yili esa unga hayotini butunlay o‘zgartirib yuboradigan rol taklif etiladi. Biroq ota-onasi bu rolni darhol rad etishadi va prodyuserlar ularni uzoq vaqt davomida ko‘ndirishga hamda murosaga kelishga majbur bo‘lishadi.
“Garri Potter” filmi prodyuseri Devid Xeymen va ssenariy muallifi Stiv Klovz Denielni birinchi marta 2000-yilda London teatrida ko‘rgan. Bola sahnada emas, balki tomoshabinlar orasida edi, lekin shunga qaramay, darhol e’tiborni o‘ziga tortadi.
“Orqamda katta-katta moviy ko‘zli bola o‘tirardi. Bu Den Redkliff edi. Birinchi taassurotlarim hali-hanuz yodimda... U qiziquvchan, hazilkash va g‘ayratli edi. U juda samimiy va yoqimtoy edi”, deya hikoya qiladi Xeymen 2009-yilda Los Angeles Times jurnalisti Jeff Bushga.
O‘sha paytga kelib, “Garri Potter” ijodkorlari 7 oydan beri bosh rolga aktyor izlab yurgan edilar.
Redkliffni kastingga taklif qilishadi, biroq yosh aktyorning ota-onasi uni yuborishni istamaydi. Aslida o‘sha paytda suratga olish ishlari Buyuk Britaniyada emas, balki AQShda o‘tkazilishi rejalashtirilgani uchun Alan va Marsiya prodyuserlarga bunday keskin o‘zgarishlar bolaning hayotiga salbiy ta’sir ko‘rsatishini aytgan. Redkliffning ota-onasi kichkina o‘g‘lining 6 oy davomida uydan uzoqda suratga tushishidan mamnun emasdi va suratga olish ishlari Los-Anjelesda bo‘lib o‘tishidan xavotirlari borligini ro‘kach qilib, taklifni rad etishadi.
Biroq prodyuserlar ham bo‘sh kelishmaydi, ota-onasini ko‘ndirishga harakat qilishadi. Bir necha oy o‘tgach, suratga olish ishlari Buyuk Britaniyada bo‘lib o‘tishi va yosh aktyorlarning okean ortiga uchishiga hojat qolmasligi ma’lum bo‘ladi. Yakunda Alan va Marsiya kastingga rozilik berishadi.
Menimcha, o‘sha paytda maktabda haqiqatan ham yaxshi o‘qimaganimni hisobga olib, ota onam: “Balki unga kastingdan o‘tishga ruxsat berish kerakdir”, deb o‘ylashdi. Hammasi shundan boshlandi, deb eslaydi keyinchalik Redkliff.
Denielning nomzodi bo‘yicha qaror bir ovozdan qabul qilinadi. Rejissor Kris Kolambus va Joan Rouling ham bundan yaxshiroq Garrini topa olmasliklariga amin edilar.
Darvoqe, Redkliffni rozi qilish uchun Warner Bros. studiyasi yana bir yon berishga majbur bo‘ladi va unga bir vaqtning o‘zida ikkita film uchun shartnoma taklif qiladi. Albatta, oxir-oqibat bu 8 ta aqlbovar qilmaydigan muvaffaqiyatli filmni o‘z ichiga olgan shartnomaga aylanadi.
Birinchi filmdan so‘ng bu rolda nafaqat boshqa Garrini, balki boshqa Germiona va Ronni ham tasavvur qilib bo‘lmasdi. Deniel esa so‘nggi film uchun 26,5 million dollar miqdorida katta gonorar olib, pop-madaniyat tarixida munosib o‘rin egalladi.
Izoh (0)