Dunyoga mashhur aktyorlar ko‘pincha ma’lum bir obrazda tomoshabin ko‘z o‘ngida muhrlanib qoladi va aktyorni boshqa rolda tasavvur qilish qiyindek tuyuladi. Aslida, muvaffaqiyatga erishgan aktyorlarning barchasi ham orzusidagi rolni ijro etmagan. Sevimli qahramonlarimizni o‘ynagan aktyorlar butunlay boshqa sujetda o‘zini sinab ko‘rishni istashi bunga yaqqol misoldir.
Kianu Rivz – Rosomaxa
Ma’lum bo‘lishicha, uzoq yillar davomida kino sanoatida ishlab kelayotgan Kianu Rivz Rosomaxa rolini ijro etishni doim istagan. Shunday bo‘lsa-da, u rejissorlar tanlovini hurmat qiladi va Hyu Jekman ushbu rolni professional tarzda ijro etganini e’tirof etadi. Marvel studiyasi direktorining aytishicha, Kianuga so‘nggi vaqtlarda ko‘plab rollar taklif etilgan. Balki, tez orada aktyorni Marvel olamida uchratarmiz?
Tom Holland – Jeyms Bond
Tom Holland yoshlik chog‘idan O‘rgimchak-odam rolini o‘ynashni istagan va o‘z maqsadiga erishgan iqtidorli aktyordir. Agar Jeyms Bondning yoshligini o‘ynash imkoniyati tug‘ilsa, u albatta ushbu rolni ijro etishga tayyor ekanligini bildirgan.
Skarlet Yoxansson – Disney malikasi
So‘nggi yillarda Skarlet Yoxansson kuchli va jangovar ayol obrazlarida suratga tushib kelmoqda. Disney filmlarida rol o‘ynash fikri aktrisada uzoq vaqt avval paydo bo‘lgan. Skarletning qizi onasini malika obrazida ko‘rishni iltimos qilganidan so‘ng aktrisa Disneyga murojaat qilgan. Ammo afsuski, hozircha Disneydan hech qanday taklif kelib tushmagan.
Uill Ferrell – Saymon Kouell
Komik aktyor Uill Ferrel “X-factor”, “American idol” kabi teleshou jyuri a’zosi rolini o‘ynash istagi borligini aytgan. Bunday rol aktyorga qiyinchilik tug‘dirmaydi. Axir tashqi ko‘rinishni grim orqali Saymon Kouellga o‘xshatish qiyin emas.
Jennifer Lourens - Bridjit Jons
Jennifer Lourens hayotda kamtar inson bo‘lib, orzusidagi rol ham shunga mutanosib: u Bridjit Jonsni sevib tomosha qiladi. Aktrisa har safar uyini sog‘inganda yoki kayfiyati yo‘qligida Bridjit Jons marafonini uyushtirishini tan oldi. Jennifer Rene Zellvegerning rolni yaxshi ijro etganini tan oladi, ammo ba’zida, Lourens Bridjit Jons filmlari hech qachon suratga olinmasa, rolni o‘zim o‘ynagan bo‘lardim, deb hazillashadi.
Gugu Mbata-Rou –— Kleopatra
Ingliz aktrisasi Gugu Mbata-Rou bolaligidan tarixiy lider ayol Kleopatrani juda hurmat qiladi. U kelajakda Kleopatra hukmronligiga bag‘ishlangan yoki Misr madaniyatiga oid tarixiy filmda o‘ynash uchun hamma narsaga tayyor ekanligini aytgan.
Deniel Redkliff – O‘rgimchak-odam
Garri Potter roli bilan muxlislar mehrini qozongan Deniel Redkliff yaqin kelajakda biror super qahramon rolini ijro etishni xohlashini tan oldi. Mazkur rol Tom Hollandga berilganidan biroz ranjigan bo‘lsa-da, Marvel studiyasining boshqa loyihalarida ishtirok etishga qarshi emas. Faqat loyiha “Garri Potter”ga o‘xshab uzoq yillar davom etadigan franshiza bo‘lishini istamaydi.
Izoh (0)