Garri Potter obrazi bilan tanilgan aktyor Deniel Redkliff yosh sehrgar haqidagi roman uning hayotini butkul o‘zgartirib yuborganini inkor qilmaydi. Umuman olganda aktyor badiiy kitoblar mutolaa qilishni yaxshi ko‘radi va muhabbat, o‘lim va hayot falsafasi haqidagi asarlarni yoqtiradi. Quyida Deniel Redkliff shaxsiy kutubxonasidagi eng sevimli asarlarini sanab o‘tamiz.
Mixail Bulgakov, “Usta va Margarita”
Sirli usta va turmushga chiqqan Margarita o‘rtasidagi munosabatlar haqidagi roman Redkliffning sevimli asari. Uning ta’kidlashicha, romanda haqiqiy sevgi va nafrat, yaxshilik va yomonlik o‘rtasidagi kurash haqida so‘z boradi va Bulgakovning uslubi, hazil tuyg‘usi, qahramonlarning ta’rifi, ular so‘zlaydigan hikoyalari, boshidan kechirgan taqdirlari — bularning barchasi ajoyib tasvirlangan. Darhaqiqat, Deniel Bulgakovning boshqa asarlari bilan ham yaqindan tanish. Aktyor rus klassikasining mashhur asari asosida yaratilgan Britaniyaning “Yosh shifokor kundaligi” teleserialida suratga tushgan.
Ernest Heminguey, “Chol va dengiz”
Inson va tabiat o‘rtasidagi kurash haqidagi falsafiy hikoyadan ko‘plab savollarga javob topish mumkin. Asarda adib inson va tabiat o‘rtasidagi bog‘liqlikni, insoniyatning hamisha kurashuvchanligini tasvirlaydi. Aktyorning fikricha, kitobdagi markaziy mavzu muvaffaqiyatsizlik bo‘lsa ham, qahramon omadsizlikka uchraganiga qaramay, oxirigacha kurashishni davom etadi. Bu o‘z navbatida insonga ulug‘vorlik bag‘ishlaydi.
Mixail Bulgakov, “Oq gvardiya”
Deniel Redkliff rus adabiyoti bilan yaqindan tanish. U Bulgakovning yana bir asari “Oq gvardiya”ni juda qadrlaydi. Romanda vatan tuprog‘iga tushgan “g‘uborli zulmat” — fuqarolar urushi, an’analar va negizlarning barbod bo‘lishi hamda eski hayot abadiy o‘tmishda qolishi haqida hikoya qilinadi.
Emil Zolya, “Germinal”
Asarda 19-asrda Shimoliy Fransiyadagi konchilar va ishchilarning og‘ir hayoti tasvirlanadi. “Germinal”da ijtimoiy tengsizliklar, mehnatkashlarning o‘z huquqlari va yaxshi hayot uchun kurashi haqida so‘z boradi. Syujetga ko‘ra, qahramonlar ochlik, qashshoqlik va charchoq tufayli qo‘zg‘olon ko‘taradi va buning oqibati dashatli yakunlanadi. Ammo germinal — bu yangi narsaning boshlanishi, demak, barchasi bejizga bo‘lmaydi. Darvoqe, Emil Zolya erkin va realistik asarlari uchun bir necha bor tanqid qilingan.
Hanter S. Tompson, “Las-Vegasdagi qo‘rquv va nafrat”
Deniel Redkliff 20-asrning eng munozarali romanlaridan birini e’tiborsiz qoldirmadi.
“Bu kitob men o‘qigan asarlar orasida eng qiziqarli va shu bilan birga eng hayratlanarlisidir”, deydi aktyor “Las-Vegasdagi qo‘rquv va nafrat” kitobi haqida.
Asar Amerika orzusining ikkinchi tomoni haqidagi sarguzashtli hikoya bo‘lib, real hayot voqealariga asoslangan.
Izoh (0)