Ba’zi filmlarda ishoralar shunchalik yaxshi yashiriladiki, ularni topish uchun muxlislarga bir necha yil kerak bo‘ladi. Bular boshqa kinoga havolalar yoki syujetni to‘ldiruvchi yashirin detallar bo‘lishi mumkin.
“Garri Potter va hikmatlar toshi”
Franshizaning birinchi qismida aktrisa Emma Uotson tish protezlarini taqib olganini ko‘rish mumkin. Chunki kitobda Germiona Grenjer old tishlari katta qizcha qilib tasvirlangan. Biroq film rejissyori Kris Kolambus aktrisaga protez tishda o‘ynash noqulay ekanligini tezda tushunib, bu g‘oyadan voz kechadi. Emma Uotson chindan ham uzoq vaqt davomida protez taqib yurishi kerak edi, chunki faqat to‘rtinchi kitobdagina Germionadan tavqi la’nat olib tashlanganidan va Garri kasalxonaga yotqizilganidan keyin chiroyli tabassumga ega bo‘ladi.
Darvoqe, moviy ko‘zli Deniyel Redklif ham yashil kontakt linza taqishi kerak edi, lekin bu linzalar uning ko‘zini shu qadar og‘ritadiki, Joan Rouling bilan maslahatlashib, ko‘zining tabiiy rangi bilan qoldirishga qaror qilishadi.
“Addamslar oilasi”
Addamslar oilasi haqidagi filmda Mortishaning ko‘zlari, nafaqat mukammal pardoz bilan, balki sahna yoritilishidan qat’i nazar, qo‘shimcha yorug‘lik nuri bilan ham yoritilardi. Bu uning obrazini — klassik Gollivud filmlaridan chiqqandek ko‘rinadigan mash’um ayol tasvirini ta’kidlash maqsadida qilingan edi. Qadimdan bunday usul aktyorning ko‘zlariga e’tiborni jalb qilib, nigohga dramatik teranlik baxsh etgan.
“Trumen tomoshasi”
“Trumen tomoshasi” filmida realiti-shou yaratuvchilari doimiy ravishda kadrda qandaydir tovarlarning nomlarini reklama qilishadi, ammo bu faqat filmni qayta ko‘rib chiqqanda, asosiy syujet ma’lum bo‘lganidagina ayon bo‘ladi. Ammo keyinchalik juda ko‘p qiziqarli narsalarni payqash mumkin.
Masalan, Trumenning ekrandagi rafiqasi gulli oq shoyi xalatda paydo bo‘ladi, keyinroq esa xuddi shu xalatni teleko‘rsatuv tomoshabinlaridan birida ko‘rish mumkin. Bu Trumenning soxta realligi qanchalik tijoratlashtirilganini yana bir bor ta’kidlaydi.
“Sobiq sevgilimning arvohlari”
2009-yilda suratga olingan filmda aktrisa Krista Brittani Allen Jennifer Garnerning yoshligini o‘ynaydi. Ammo bu shunchaki tasodif emas. 5 yil oldin ular “13 dan 30 gacha” filmining suratga olish maydonchasida tanishgan, o‘sha filmda Krista bosh qahramonning yoshligini o‘ynagan.
“To‘lin oy qirolligi”
Ues Anderson filmlarida har bir mayda detalga e’tibor berishi bilan mashhur va eng e’tiborli muxlislariga ishoralar qoldirishni yaxshi ko‘radi. Ulardan biri yaqinda muxlislar tomonidan topildi. “To‘lin oy qirolligi”da qahramonni ko‘pincha ilmiy-fantastik romanlarni o‘qiyotgan holda ko‘rish mumkin. Bu kitoblarning hech biri haqiqiy emas, lekin ulardan birining orqa tomonida Frenk Gerbertning “Dyuna”sidagi xarita tasvirlangan.
Bu ishorani o‘n yil davomida hech kim sezmagan — uni Deni Vilnyovning “Dyuna” blokbasterining ikkinchi qismi ekranlarda muvaffaqiyatli namoyish etilganidan keyingina payqashgan.
“Dedpul va Rosomaxa”
“Dedpul va Rosomaxa” blokbasterida Jon Xyuzning mashhur “Samolyot, poyezd, mashina” komediyasidagi yonib ketgan avtomobil kadrga kiritilgan. Bu bejiz emas: Dedpul rolini ijro etgan aktyor Rayan Reynolds bu filmning, ayniqsa Jon Kendi personajining katta muxlisi. Shu sababli Dedpul va Rosomaxaning do‘stligi Jon Kendi va Stiv Martin qahramonlari o‘rtasidagi munosabatga o‘xshab rivojlanadi: jiddiy va jahldor Rosomaxa sergap Dedpulga zo‘rg‘a toqat qiladi.
Rayan Reynoldsning asli kanadalik ekanligini hisobga olsak, uning komediya uslubi yana bir kanadalik aktyor Jon Kendi ta’sirida shakllanganligiga hayron qolmasa ham bo‘ladi. Jon Kendiga hurmat ko‘rsatish maqsadida Rayan Reynolds hatto u haqda hujjatli film suratga olishni rejalashtirmoqda.
“Sumerki”
Franshizaning birinchi filmida Bella maktab oshxonasida qo‘lidagi olmasini tushirib yuboradi. Edvard uni ushlab qolganida, filmga asos bo‘lgan xuddi shu nomdagi roman muqovasidagi tasvirni takrorlab, mevani kaftlarida ushlab turadi.
“Titanik”
Film boshida Rouzning soch turmagi va liboslari ancha rasmiy hamda jiddiy. Qahramon birinchi marta ko‘rsatilganda uning oq va qora chiziqli kostyumi mahbuslar kiyimini eslatadi. Biroq u Jekni sevgani sayin, soch turmagi va kiyinishi shunchalik erkinlashadi.
Rouz filmning boshida zinapoya soati oldida Jek bilan uchrashganda kiygan ko‘ylagi finalda ham takrorlanadi. U aynan o‘sha ko‘ylak, biroq kiyimning rangi oq. Shundan taxmin qilish mumkinki, Rouz vafotidan so‘ng sevgilisi bilan qayta topishadi va shu tariqa soat oldida uchrashish va’dasini bajaradi. Bunday yechim film sahnalarini nozik tarzda bir-biriga bog‘laydi va qahramonlarga ularning hikoyasiga baxtli yakun hadya etadi.
“Garri Potter va Azkaban mahbusi”
Franshizaning uchinchi qismida Do‘mboq xonim portreti yonida ayol va bola tasvirlangan jonli kartinani ko‘rish mumkin. Bu rolda film rejissyori Alfonso Kuaronning rafiqasi va qizi ko‘rinish beradi.
Izoh (0)