Yuqoriga ko‘tarilish va tushish har qanday kasbda sodir bo‘lishi mumkin va aktyorlik bundan mustasno emas. Quyida karyerasini katta rollardan boshlab, keyin kichik rollarga o‘tgan yoki karyerasida tanaffus qilgan aktyorlarni eslaymiz. Bu ro‘yxatda kinodagi tanaffusidan so‘ng yangi kuch bilan katta ekranga qaytganlar ham, aktyorlikni butunlay tark etishga qaror qilganlar ham bor.
Emma Uotson
Emmaning aktyorlik karyerasi juda erta boshlangan. “Garri Potter”ning birinchi filmi chiqqanida u atigi 11 yoshda edi. Franshizani tugatgandan so‘ng, Uotson kinoni tark etmagan holda ta’lim olishga qaror qiladi. Emma 2014-yilda bakalavr darajasini oladi, 2023-yilda esa yulduz Oksfordga o‘qishga kiradi.
Aftidan, Uotson hozir butun diqqatini o‘qishga qaratganga o‘xshaydi, chunki uning ishtirokidagi so‘nggi film — “Kichkina xonimlar” 5 yil oldin ekranlarga chiqqan.
Kameron Dias
2014-yilgacha Kameron Dias muntazam ravishda bir nechta prokat filmlarda suratga tushgan. 20 yillik faoliyati davomida yulduz o‘zini barcha janrlarda sinab ko‘rishga muvaffaq bo‘ldi — jangari filmlardan tortib (“Charli farishtalari”) tarixiy dramalargacha (“Nyu York to‘dalari”). Aftidan, Dias juda ko‘p ishlashdan charchagan, shuning uchun ham tanaffus qilgan.
Oradan 10 yil o‘tganiga qaramay aktrisa bu yil kinoga qaytishga va’da bermoqda.
Mettyu Makkonahi
Mettyu Makkonahi ikki marta kinodan ketadi. Aktyor birinchi marta uni mashhur qilgan bir qator romantik komediyalardan so‘ng tanaffus qiladi. Farzandi tug‘ilgandan keyin Mettyu 2 yil davomida kasbini tark etadi va keyin yangi kuch bilan butunlay boshqacha obrazda qaytadi.
Katta muvaffaqiyatdan so‘ng Makkonahi yana shou-biznesni tark etadi. Aktyorning so‘zlariga ko‘ra, faoliyatidagi to‘rt yillik tanaffus unga yanada yaxshi aktyor bo‘lishga imkon bergan. U ko‘p o‘qigan va yozgan, xayriya ishlari bilan shug‘ullangan. Hozirda suratga olish unga ish emas, ajoyib dam olishdek tuyuladi.
Meg Rayan
Meg Rayan 80 va 90-yillarning har bir yirik serialida rol o‘ynagan holda muvaffaqiyatli karyera qurgandi. Ammo keyinchalik Meg ekranlardan g‘oyib bo‘ladi. Ba’zilar bunga shaxsiy hayotidagi muammolar sabab bo‘lganini aytishsa, boshqalar bu tanaffusni charchash bilan izohlashadi. 2015-yilda chiqqan “Itaka” dramasiga Rayan ham aktrisa, ham rejissyorlik qiladi. 2023-yilda esa Meg Devid Duxovniy bilan romkomda suratga tushadi. “Keyin nima bo‘ladi” filmi Rayanning 8 yil ichida birinchi katta rejissyorlik va aktyorlik ishi bo‘ldi.
Jek Nikolson
Jek Nikolson tirik afsonadir. Aktyor o‘zining ketishini rasman e’lon qilmadi, ammo 2010-yilda chiqqan film muvaffaqiyatidan so‘ng Nikolson yangi rollardan voz kechadi. Oradan 14 yil o‘tadi. Unda Toni Erdman filmida suratga tushish imkoniyati bor edi, biroq 2018-yilda aktyor fikrini o‘zgartirib, taklifni rad etadi.
Zoi Deshanel
2009-yilda “Yozning 500 kuni” romantik komediyasi chiqqanida Zoi haqiqiy yulduzga aylanadi. Ushbu ajoyib muvaffaqiyatdan so‘ng, aktrisa yana bir nechta loyihalarda, jumladan, “Yangi kelgan qiz” sitkomida bosh rolni o‘ynaydi. Aktyorlik karyerasi bilan bir qatorda, Zoi musiqani o‘rgangan va vaqti-vaqti bilan qo‘shiq yozish, festivallarda chiqish uchun filmlardan tanaffus qilgan. 2022-yilda Deshanel “Yovvoyi tushlar” filmidagi roli bilan katta kinoga qaytdi. Bu uning 7 yil ichidagi birinchi yirik ishi bo‘ldi.
Ien Somerxolder
Aftidan, “Hayot-mamot” va “Vampir kundaliklari” filmi yulduzi aktyorlik faoliyatini yakunlayotganga o‘xshaydi. Uning ishtirokidagi so‘nggi to‘liq metrajli film 2016-yilda chiqqan. Hozirda sobiq aktyor rafiqasi Nikki Rid bilan farzandlarini tarbiyalaydi va biznes bilan shug‘ullanadi. U rafiqasi bilan birgalikda oziq-ovqat qo‘shimchalari ishlab chiqaruvchi kompaniyani boshqaradi.
Lara Flinn Boyl
Lara Flinn Boyl 90-yillarda yulduz edi. U ikkita kult teleserial tufayli mashhur bo‘ladi — “Egizak cho‘qqilar” va “Emmi” mukofotiga nomzod bo‘lgan “Amaliyot” seriallari, shuningdek, aktrisa “Qora libosli odamlar 2” blokbasterida asosiy rollardan birini o‘ynaydi. Ushbu muvaffaqiyatdan keyin u asosan kam byudjetli filmlarda ishtirok etadi. So‘nggi yillarda aktrisa ekranlardan butunlay g‘oyib bo‘ldi. Uning oxirgi asarlari — “Omadli it” (2014) va “Bir paytlar Texasda” (2020) nomli filmlar bo‘ldi.
Izoh (0)