Isroil bosib olingan G‘arbiy Sohilda yangi turar joylar qurishni rejalashtirdi. Sharqiy Quddus va Ma’ale Adumim shaharlari orasidagi E1 deb nomlangan loyiha o‘n yillardan buyon muzlatib qo‘yilgan edi. Yevropa ittifoqi diplomatiyasi rahbari Kaya Kallas turar joylar qurilishiga qarshi chiqdi. Bu haqda Deutsche Welle xabar berdi.
Kallasning so‘zlariga ko‘ra, Isroilning rejasi ikki davlat tuzish to‘g‘risidagi qarorga putur yetkazadi. Bu xalqaro huquqning buzilishiga olib keladi.
Agar qurilish amalga oshirilsa, bu qadam “bosib olingan Sharqiy Quddus va Iordan daryosining G‘arbiy qirg‘og‘i o‘rtasidagi geografik va hududiy aloqani abadiy buzadi. G‘arbiy qirg‘oqning shimoliy va janubiy qismlari o‘rtasidagi aloqani uzib qo‘yadi, deya ogohlantirdi u.
Yevropa ittifoqi yana bir bor Isroilni aholi punktlari qurishni to‘xtatishga chaqirdi. Ushbu “bir tomonlama qarorlar” shundoq ham keskin vaziyatni yanada kuchaytiradi. Shuningdek, tinchlikka erishishning har qanday imkoniyatiga putur yetkazadi. Yevroittifoq fikricha, Isroil ikki davlat asosidagi yechimning amalga oshirilishini ta’minlash uchun zarur choralarni ko‘rishi lozim.
Germaniya Isroilning aholi punktlarini qurish rejalarini qoraladi
Germaniya federal hukumati ham Isroilning Iordan daryosining G‘arbiy qirg‘og‘ida qurilish rejalarini tanqid qildi.
Shaharchalar qurilishi xalqaro huquq va BMT Xavfsizlik Kengashining tegishli rezolyutsiyalarini buzadi. Bu ikki tomonlama kelishuvga erishishni va Xalqaro jinoiy sud talab qilganidek, G‘arbiy sohildagi Isroil okkupatsiyasini tugatishni qiyinlashtiradi, dedi Germaniya Tashqi ishlar vazirligining vakili.
Izoh (0)