AQSH prezidenti Donald Tramp Rossiya rahbari Vladimir Putin bilan Alyaskaning Ankorij shahrida o‘tkaziladigan uchrashuv muvaffaqiyatsiz yakunlanish ehtimolini 25 foiz deb baholadi. Bu haqda Deutsche Welle xabar berdi.
Tramp bu haqda u 14-avgust kuni Fox News nashriga bergan intervyusida ma’lum qilgan.
“Menimcha, Putin kelishuvga erishishiga ishonyapti. Men ham shunday deb o‘ylayman. Ammo bu uchrashuv muvaffaqiyatsiz bo‘lish ehtimoli 25 foiz”, dedi Tramp.
Unga ko‘ra, mazkur uchrashuv keyingi, yanada muhim bo‘lgan sammitga zamin yaratadi. Ya’ni ushbu ikkinchi uchrashuvda chegara, hudud va boshqa masalalar bo‘yicha murosaga kelinishi mumkin. Tramp bundan so‘ng Ukraina prezidenti Vladimir Zelenskiy bilan ham uch tomonlama muloqot o‘tkazishni rejalashtirmoqda.
Xabar qilinganidek, AQSH va Rossiya prezidentlari o‘rtasidagi keng miqyosdagi uchrashuv bugun, 15-avgust kuni Alyaskadagi Elmendorf-Richardson harbiy-havo kuchlari bazasida bo‘lib o‘tadi. Avval ikki rahbar tarjimonlar ishtirokida yakkama-yakka suhbatlashadi, so‘ng delegatsiyalar formatida muzokaralar davom etadi va nonushta tashkil qilinadi.
Rossiya delegatsiyasi tarkibida Tashqi ishlar vaziri Sergey Lavrov, Mudofaa vaziri Andrey Belousov, Moliya vaziri Anton Siluanov va boshqa rasmiylar bo‘ladi. Uchrashuv yakunida Tramp va Putin qo‘shma matbuot anjumani o‘tkazishi kutilmoqda. Muzokaralardagi asosiy mavzu — Ukrainada tinchlik o‘rnatish. Shuningdek, ikki tomon o‘rtasidagi savdo-iqtisodiy hamkorlik va xavfsizlik masalalari ham muhokama qilinadi. Trampning ta’kidlashicha, muzokaralardagi maqsadlar — o‘t ochishni to‘xtatish, “Ukrainasiz hech qanday qaror qabul qilmaslik” tamoyiliga rioya qilish hamda adolatli va barqaror tinchlikdan so‘ng xavfsizlikni ta’minlashdir.
Izoh (0)