AQSH prezidenti Donald Tramp kelgusi hafta Ukraina prezidenti Vladimir Zelenskiy bilan uchrashib, urush haqida suhbatlashishi mumkinligini ma’lum qildi.
Tramp bu uchrashuv shaxsan bo‘ladimi yoki videokonferensiya tarzida o‘tkazilishiga aniqlik kiritmadi. U Yaponiya bosh vaziri Sigeru Isibani Oq uyning Oval kabinetida qabul qilish paytida jurnalistlarning savollariga javob berar ekan, mazkur ehtimol haqida gapirdi.
Tramp “ehtimol, kelgusi hafta prezident Zelenskiy bilan uchrashishini” aytdi.
AQSH yetakchisi, shuningdek, rossiyalik hamkasbi bilan uchrashishga yana qiziqish bildirib, Putin bilan doimo “yaxshi munosabatlar”da bo‘lganini ta’kidladi.
Zelenskiy bilan uchrashuv joyi haqidagi savolga javob berar ekan, Tramp o‘zi “shu yerda — Vashingtonda” ekanligini aytib, Kiyevga borish niyati yo‘qligini qo‘shimcha qildi.
Men bu urush shunchaki insoniylik nuqtai nazaridan tugashini istardim. Bu bema’ni urush, dedi Tramp.
U Zelenskiy bilan Ukraina boyliklarini, xususan, noyob yer minerallari xavfsizligini ta’minlash haqida gaplashmoqchi ekanligini va AQSHning qo‘llab-quvvatlashi evaziga “teng miqdorda nimadir” olishni istayotganini aytdi.
Biz ular ham o‘z navbatida shunday javob berishlarini xohlaymiz, dedi Oq uy rahbari.
Zelenskiy Trampning bayonotiga javoban Vashington va Kiyev muzokaralar o‘tkazishni rejalashtirganini ma’lum qildi.
Biz har doim prezident Tramp bilan hamkorlikni qadrlaymiz. Jamoalar darajasida uchrashuvlar va muzokaralar o‘tkazishni ham rejalashtirganmiz. Ukraina va AQSH jamoalari allaqachon tafsilotlarni ishlab chiqmoqda, deb yozdi Zelenskiy X platformasidagi postida.
Zelenskiy ma’muriyati rahbari Andrey Yermakning aytishicha, Kiyev shu oyda Trampning Ukrainadagi maxsus vakili Kit Kellogning tashrifini kutilmoqda. Yermak Kellog bilan jang maydonidagi vaziyat, Ukraina tinch aholisi xavfsizligi va shu oy oxirida bo‘lib o‘tadigan yillik Myunxen xavfsizlik konferensiyasidagi uchrashuvlar kabi mavzularni muhokama qilganini ta’kidladi.
Tramp avval ham Ukrainaning nodir yer elementlarini Amerika yordami evaziga olishga qiziqish bildirgan edi.
Biz Ukraina bilan shunday bitim tuzmoqchimizki, unga ko‘ra, ular bizdan olayotgan narsalar evaziga bizga nodir yer elementlari va boshqa mahsulotlarni berishadi, dedi Tramp.
U nodir yer elementlari yetkazib berilishining xavfsizligini ta’minlashni istayotganini va Ukraina bu borada yordam berishga tayyor ekanligini qo‘shimcha qildi.
Biz yuzlab milliard dollar sarmoya kiritmoqdamiz. Ularda ajoyib nodir yer elementlari mavjud, deb ta’kidladi AQSH prezidenti.
Ukrainaning AQSH bilan noyob minerallarni birgalikda qazib olish bo‘yicha taklifi mamlakat prezidenti Vladimir Zelenskiy 2024-yil oktyabrda — Amerikadagi prezidentlik saylovidan oldin, Tramp va respublikachi kongressmenlarga taqdim etgan “g‘alaba rejasi”ning bandlaridan biri hisoblanadi. Bu haqda Financial Times (FT) nashri yozgan, keyinroq esa Ukraina prezidenti ofisi maslahatchisi Mixail Podolyak ushbu ma’lumotni tasdiqlagan va gap, xususan, litiy va titan konlari haqida ketayotganiga aniqlik kiritgan.
Izoh (0)