Janubiy Koreya prezidenti Li Je Myong 15-avgust kuni Shimoliy Koreya siyosiy tizimini hurmat qilishga va harbiy ishonchni mustahkamlashga va’da berdi. Bu haqda Al Arabiya xabar berdi.
Li Je Myong ushbu gaplarni yapon mustamlakasidan ozodlik bayrami munosabati bilan o‘tkazilgan tadbirda so‘zlagan. U, iyun oyida prezident etib saylanganidan beri, yadroviy qurolga ega Shimol bilan shartsiz muloqot o‘rnatish niyatida ekanini bildirmoqda. Bu uni avvalgi keskin siyosat yuritgan prezidentdan yaqqol ajratib turibdi.
“Janubiy Koreya hukumati keskinlikni kamaytirish va o‘zaro ishonchni tiklash uchun izchil choralar ko‘radi. Seulning Shimolga qarshi dushmanona harakatlar qilish niyati yo‘q. Pxenyanni muloqotni qayta tiklashga chaqiraman”, degan prezident.
Biroq prezident bu gaplarni Shimoliy Koreya yetakchisining singlisi Kim Yo Jong Janub bilan aloqalarni yaxshilash niyati yo‘qligini bildirganidan bir necha kun o‘tib aytmoqda. Xususan Yo Jong shunday degan edi:
“Seul qanday siyosat yuritishidan va qanday takliflar kiritishidan qat’iy nazar, biz ular bilan qiziqmaymiz. Janubiy Koreya bilan uchrashishga ham, gaplashishga ham hech qanday sabab yo‘q”.
Shuningdek, Yo Jong Shimoliy Koreya tashviqot radiokarnaylarini olib tashlayotgani haqidagi xabarlarni rad etgan. Janub harbiylari esa iyun oyida ikki davlat demilitarizatsiya qilingan hudud bo‘ylab tashviqot eshittirishlarini to‘xtatganini, o‘tgan hafta chegarada Shimoliy Koreya qo‘shinlari radiokarnaylarni demontaj qilayotganini aniqlagandi.
Izoh (0)