Kanada va Meksikadan import uchun 25 foizli bojning joriy etilishi savdo urushini boshlashga emas, balki narkotrafikka qarshi kurashga qaratilgan, deya ma’lum qildi Oq uyning iqtisodiyot bo‘yicha maslahatchisi Kevin Xessett CNBC telekanali efirida.
Ushbu hikoya mutlaqo noto‘g‘ri talqin qilinmoqda. Siz prezident Trampning farmonini qayta o‘qib chiqishingiz kerak, unda bu savdo urushi emas, balki giyohvand moddalarga qarshi urush ekani aniq aytilgan, dedi u.
Xessetning aytishicha, giyohvand moddalar, ayniqsa fentanil oqimi AQSHga Kanada va Meksika chegaralari orqali kirib kelmoqda va o‘tgan yilning o‘zida buning oqibatida 100 mingga yaqin amerikalik halok bo‘lgan.
Meksikaliklarning 80, 90, hatto 95 foizi giyohvand moddalarga qarshi kurashni qo‘llab-quvvatlamoqda. Kanadada ham ahvol xuddi shunday, deya qo‘shimcha qildi u.
Maslahatchining ta’kidlashicha, Meksika allaqachon AQSHga Tramp talablariga jiddiy munosabatda ekanligini va chegaradan narkotik moddalar o‘tkazilishiga qarshi kurashni kuchaytirishga tayyorligini ma’lum qilgan.
Yaxshi xabar shuki, dam olish kunlaridagi muzokaralarimiz davomida meksikaliklar prezident Tramp farmonini bajarishga juda jiddiy yondashayotganini va narkotik moddalarga qarshi kurashda ancha qat’iyroq harakat qilishga tayyor ekanliklarini kuzatdik. Biroq, kanadaliklar uning to‘g‘ridan-to‘g‘ri ma’nosini noto‘g‘ri tushunganga o‘xshaydi va vaziyatni savdo urushi sifatida qabul qilmoqda, deya ta’kidladi Xessett.
Avvalroq AQSH yetakchisi Kanada va Meksikadan import qilinadigan mahsulotlarga 25 foizlik boj to‘lovi joriy etilishini e’lon qilgan edi. U buni AQSHga janubiy va shimoliy chegaralar orqali kirib kelayotgan narkotik moddalarga qarshi kurashni kuchaytirish zarurati bilan izohlagan.
Meksika Tramp bojlariga “B” reja bilan javob qaytaradi
Meksika prezidenti Klaudiya Sheynbaum Tramp tomonidan uning tovarlariga 25 foizlik boj joriy etilganiga javoban shunga o‘xshash va yana bir qator choralarni ko‘rishini aytdi.
Iqtisodiyot vaziriga Meksika manfaatlarini himoya qilish uchun tarif va notarif choralarni o‘z ichiga olgan B rejasini amalga oshirishni topshiraman. Hech narsani zo‘rlik bilan qilma, hammasini aql-idrok bilan qil. Oq uyning bizning hududimizga har qanday tajovuzlarini va jinoiy tashkilotlar bilan aloqadorlikda ayblangan Meksika hukumatiga nisbatan tuhmatini qat’iyan rad etamiz, dedi Sheynbaum.
Meksika prezidenti AQSHni fentanilga qarshi kurashda hamkorlik qilishga chaqirdi va Meksika qo‘shni davlatlar bilan qarama-qarshilikni istamasligini ta’kidladi. Sheynbaumning ta’kidlashicha, Meksika giyohvand moddalar savdosiga qarshi kurash choralarini ko‘rmoqda: to‘rt oy mobaynida mamlakat hukumati 40 tonnadan ortiq giyohvand moddalarni, jumladan 20 million doza fentanilni musodara qilgan.U AQSHga mamlakat ichida ushbu muammoga qarshi kurashishni maslahat berdi: Amerika shaharlarida giyohvand moddalar savdosining oldini olish va bunday operatsiyalardan olingan mablag‘larni legallashtirish uchun jazolash choralarini ko‘rish lozim.
Izoh (0)