AQSH prezidenti Donald Tramp mamlakatdan Britaniya shahzodasi Garrini deportatsiya qilish ehtimoliga munosabat bildirdi. Bu haqda The New York Post xabar berdi.
Garrining immigratsiya maqomi Vashingtondagi sud jarayonining mavzusi bo‘lib, Heritage fondi uning ilgari taqiqlangan moddalarni iste’mol qilgani haqidagi ma’lumotlarni yashirgan bo‘lishi mumkinligini ta’kidlamoqda. Bu esa AQSH vizasini olishga to‘siq bo‘lishi kerak edi. Biroq Tramp uni mamlakatdan chiqarib yuborishdan manfaatdor emasligini aytdi.
“Men bunday qilmoqchi emasman. Uni tinch qo‘yaman. Uning rafiqasi (Megan Markl) bilan muammolari shundoq ham yetarli. Bu dahshatli”, degan prezident.
Tramp, shuningdek, Garrining akasi shahzoda Uilyamni maqtash imkoniyatidan foydalangan. U bilan dekabr oyida Parijda Notr-Dam soborining qayta ochilish marosimidagi yopiq kechada uchrashganini eslagan.
“Menimcha, Uilyam ajoyib yigit”, deya ta’kidlagan u.
Garri va uning amerikalik rafiqasi Megan Markl bir necha bor Trampni tanqid qilgan. Xususan, o‘z bayonotlaridan birida Markl prezidentni “jamiyatni bo‘luvchi” va “ayollarga nafrat bilan qarovchi” deb atagan. Tramp bunga javoban Garrini rafiqasining “yo‘l-yo‘rig‘idan chiqmaydi” deb ta’riflagan.
“Nazarimda, bechora Garrini burnidan ip o‘tkazib, sudrab yurishibdi”, degan AQSH rahbari.
Heritage fondi dalil sifatida shahzodaning kokain, marixuana va psixodeliklarni iste’mol qilganini tan olgan avtobiografiyasidan foydalangan. 2024-yili fond AQSH ichki xavfsizlik departamentiga qarshi sudga murojaat qilib, uning viza hujjatlarini ochiqlashni talab qilgandi.
“AQSHga kirish uchun ariza topshirgan har bir kishi o‘z so‘rovnomasida to‘g‘ri bo‘lishi kerak va shahzoda Garri bilan shunday bo‘lgan-bo‘lmagani noma’lum”, degan edi Heritage vakili Nil Gardner.
Tahlil markazining ta’kidlashicha, Garri 2020-yilda qirollik oilasidan chiqqanidan so‘ng Kaliforniyaga ko‘chib o‘tgach, sobiq prezident Jo Bayden ma’muriyati tomonidan alohida e’tiborga sazovor bo‘lgan bo‘lishi mumkin.
Izoh (0)