Agar Yevropa ittifoqi AQSHdan neft va gaz sotib olishni oshirmasa, Vashington bojlarni joriy qiladi. Bu haqda saylangan prezident Donald Tramp Truth Social ijtimoiy tarmog‘ida ma’lum qildi.
“Men Yevropa ittifoqiga Qo‘shma Shtatlar bilan munosabatlardagi ulkan taqchillikni bizning neft va gazni keng ko‘lamli xarid qilish orqali to‘ldirishlari kerakligini aytdim”, deydi u.
Tramp “aks holda bojlar joriy etilishini” ta’kidladi.
Avvalroq saylangan prezident YI bilan 300 mlrd dollarlik savdo taqchilligidan shikoyat qilib, butun importga yangi 10-20 foizli bojlar joriy etish bilan tahdid qilgandi. Bloomberg nashri ekspertlari Yevropa ittifoqi va AQSH o‘rtasidagi savdo urushini istisno qilmagan.
Yevrokomissiya, shuningdek, Trampning butun Amerika importiga 3 trillion dollarlik tariflar belgilash haqidagi va’dasidan xavotir bildirdi. 575 milliard dollarlik Yevropa avtomobillari, farmatsevtika va boshqa mahsulotlar zarar ko‘rishi taxmin qilinmoqda.
AQSHning Yevropa ittifoqidagi sobiq elchisi Entoni Gardnerning ta’kidlashicha, “Tramp hech qachon Yevropa ittifoqini teng suhbatdosh sifatida tan olishdan bunchalik manfaatdor bo‘lmagan”.
YI diplomatiyasi rahbari Kaya Kallas Bryusselda bo‘lib o‘tayotgan Yevroittifoq sammitida agar AQSH va Yevropa ittifoqi savdo urushini boshlasa, yagona g‘olib Xitoy bo‘lishini aytgan edi. Shuningdek, The Washington Post gazetasi Tramp joriy qilmoqchi bo‘lgan tariflar Yevropa ittifoqi mamlakatlariga jiddiy iqtisodiy zarar yetkazishi mumkinligi haqida xabar bergan edi.
Bu harakatlar Yevropa ittifoqi va AQSH o‘rtasidagi munosabatlarga salbiy ta’sir qiladi, deb yozdi The Washington Post.
Shu bilan birga, Yevropa Markaziy banki rahbari Kristin Lagard Yevropa yetakchilari Tramp boshchiligidagi yangi Amerika ma’muriyati bilan bojlar bo‘yicha hamkorlik qilishi, shuningdek, savdo urushiga yo‘l qo‘ymaslik uchun Qo‘shma Shtatlarda ishlab chiqarilgan mahsulotlarni ko‘proq sotib olishi kerak, degan fikrni bildirgandi.
Izoh (0)